Ադրբեջանում ավելի քան 1 ամիս ժամկետով խստացված կարանտինային ռեժիմ է սահմանվել. երկրում կորոնավիրուսային նոր հակառեկորդ է գրանցվել

Ադրբեջանում սահմանվել է խստացված կարանտինային ռեժիմ՝ պայմանավորված երկրում կորոնավիրուսային հիվանդության դեպքերի թվի աճով: Այս մասին հայտնում է EurAsia Daily-ն, նշելով՝ կարանտինն ուժի մեջ է մտել երկուշաբթի տեղական ժամանակով 00:00-ին և կգործի ավելի քան մեկ ամիս` մինչև 2021 թվականի հունվարի 18-ը:

Ըստ երկրի նախարարների կաբինետին կից գործող օպերատիվ շտաբի որոշմամբ՝ այս ժամանակահատվածի համար աշխատանքը դադարեցվում է «բոլոր ոլորտներում, բացառությամբ կենսական նշանակության»: Բացառություններից են կոմունալ ծառայությունների օպերատորների և ռազմավարական արտադրության ոլորտների աշխատանքները: Բոլոր մանրածախ և հասարակական սննդի օբյեկտները (բացառությամբ մթերային խանութների և դեղատների) պարտավոր են հաճախորդներին սպասարկել միայն առցանց կամ պատվերների առաքման միջոցով:

Նշվում է՝ կառավարությունը խստացրել է նաև երկրի տարածքում մարդկանց տեղաշարժի սահմանափակումները: Մասնավորապես, երկրի 17 քաղաքներ և տարածաշրջանային կենտրոններ, ներառյալ Բաքուն, փակ են մուտքի և ելքի համար: Հանգստյան օրերին հասարակական տրանսպորտը ամբողջությամբ կանգ է առնում, իսկ կարանտինային ամբողջ ժամանակահատվածում Բաքվի մետրոն ամբողջովին փակ կլինի: Փակ քաղաքների և շրջկենտրոնների բնակիչներին արգելվում է դուրս գալ իրենց տներից առանց հատուկ անհրաժեշտության: Թույլատրված վայրերում աշխատողները պետք է գրանցվեն հատուկ պետական պորտալում և ցույց տան ոստիկանության հսկիչներին իրենց անձը հաստատող փաստաթղթերը: Ինչ վերաբերում է մնացած բոլոր քաղաքացիներին, ապա վերջիններս պետք է անհատական թույլտվություն ստանան իրենց տներից դուրս գալու համար` SMS-ի կամ ոստիկանության միջոցով: Այս թույլտվությունները տրվում են օրական երեք ժամ`խանութ, դեղատուն գնալու, բժշկական օգնություն կամ այլ անհրաժեշտ ծառայություններ ստանալու, ինչպես նաև մերձավոր ազգականների հուղարկավորությանը մասնակցելու համար:

ԶԼՄ-ն հստակեցնում է՝ տեղի իշխանությունները հարկադրված են եղել նման միջոցների դիմել համաճարակաբանական իրավիճակի էական վատթարացման պատճառով: Եթե ամռանը երկրում առավելագույն օրական ցուցանիշները չէին գերազանցում վարակման 590 դեպքը, ապա դեկտեմբերի 1-ին բժիշկները 24 ժամվա ընթացքում գրանցել են 4426 դեպք, իսկ դեկտեմբերի 13-ին գրանցվել է նոր հակառեկորդ ՝ 4451 դեպք: Նոյեմբերի 1-ից Ադրբեջանը խստացրել է «դիմակային ռեժիմը» ՝ բնակչությանը պարտավորեցնելով պաշտպանիչ դիմակներ կրել ոչ միայն ներսում, այլև փողոցում: Իշխանություններն ավելացրել են նաև տուգանքներ կարանտինային ռեժիմը խախտելու համար. ֆիզիկական անձանց համար այն կազմում է 100 մանաթ (մոտ 59 դոլար), պաշտոնատար անձանց համար՝ 200 մանաթ (մոտ 118 դոլար), իսկ իրավաբանական անձանց համար ՝ 400 մանաթ (ավելի քան 235 դոլար): Ռեժիմը բազմիցս խախտելու համար տուգանքի չափը կրկնապատկվում է:

Հիշեցնենք՝ երկրում COVID-19-ով վարակվածների ընդհանուր թիվը հասել է 175 874-ի, 111 918 մարդ դուրս է գրվել հիվանդանոցներից, ևս 62,034 հիվանդ շարունակում է ստացիոնար բուժում ստանալ: Համավարակի սկզբից ի վեր, կորոնավիրուսից առաջացած հարակից բարդություններից մահացել է 1922 մարդ, որից 39-ը վերջին օրվա ընթացքում: Երկրում ամեն օր կատարվում է առնվազն 10 հազար թեստավորում, որոնց ընդհանուր թիվը մոտենում է երկու միլիոնի: