Չինական Sinopharm-ի «դուստրը» նախատեսում է 2021թ․ կորոնավիրուսի դեմ մինչեւ 1 մլրդ դոզա պատվաստանյութեր արտադրել

Չինաստանի պետական կենսատեխնիկական խումբը (CNBG), որը վերահսկվում է Sinopharm դեղագործական ընկերության կողմից, նախատեսում է 2021թ․ կորոնավիրուսի դեմ մինչեւ 1 մլրդ դոզա պատվաստանյութեր արտադրել։ Այս մասին շաբաթ օրը հաղորդել է «Բեյցզին ժիբաո» թերթը:

«Պեկինում եւ Ուհանում գտնվող մեր երկու գործարանների համատեղ արտադրական հզորությունը ներկայումս կազմում է 300 միլիոն դոզա: Մոտավորապես այս տարվա վերջին մենք նախատեսում ենք ընդլայնել եւ 2021 թվականին կկարողանանք տրամադրել 1 միլիարդ դոզա»,- մեջբերում է հրատարակությունը CNBG-ի տնօրենների խորհրդի նախագահ Յան Սյաոմինին:

Նրա խոսքով՝ չինական ընկերության կողմից մշակված պատվաստանյութը 10 երկրներում ու տարածաշրջաններում գտնվում է կլինիկական փորձարկումների երրորդ փուլում: «Այն փորձարկվել է 60 000 կամավորների վրա, ապացուցված արդյունավետությունը մոտ 86% է»,- ասել է Յան Սյաոմինը:

Նա պարզաբանել է, որ աշխարհում կորոնավիրուսի դեմ մշակվել է 212 դեղամիջոց, որից 48-ը փորձարկվում են այն մարդկանց մասնակցությամբ, ովքեր համաձայնել են պատվաստմանը: «Միայն 11 պատվաստանյութ է գտնվում երրորդ փուլում, որից չորսը ստեղծվել են Չինաստանում՝ երեքը ապաակտիվ են, մեկը՝ վեկտորային»,- հավելել է նա:

CNBG-ն առաջին չինական դեղագործական ընկերությունը չէ, որը հայտարարել է միջազգային շուկա կորոնավիրուսի դեմ դեղերի լայնածավալ մատակարարումներ տրամադրելու պատրաստակամության մասին: Երկուշաբթի օրը Պեկինում տեղակայված Sinovac Biotech-ը հայտարարել էր, որ ավելի քան 500 միլիոն դոլարի ներդրում է հավաքել տարեկան 600 միլիոն դոզա սեփական պատվաստանյութ արտադրելու համար, հաղորդում է ՏԱՍՍ-ը: