Մեծ հաշվով սա ոչ թե «լեզվի սայթաքում է», այլ մի քիչ լղոզած հայտարարություն, որ ինքն ընդամենը հնազանդ կամակատար է. Կարեն Վրթանեսյանը՝ ԱԳՆ ղեկավարի հայտարարության մասին
Մեծ հաշվով սա ոչ թե «լեզվի սայթաքում է», այլ մի քիչ լղոզած հայտարարություն, որ ինքն ընդամենը հնազանդ կամակատար է: Այս մասին ֆեյսբուքյան իր էջում գրել է Razm.info մասնագիտացված կայքի համակարգող Կարեն Վրթանեսյանը՝ անդրադառնալով ԱԺ-ում ՀՀ ԱԳՆ ղեկավար Արա Այվազյանի կողմից արված հայտարարությանը:
«Արտգործնախարարի պաշտոնը զբաղեցնող անձն ԱԺ-ում հայտարարել է, որ ԱԳՆ-ն «ապաքաղաքական կառույց է»։
Այսինքն Հայաստանի արտաքին ՔԱՂԱՔԱԿԱՆՈՒԹՅՈՒՆՆ իրագործող հիմնական գերատեսչությունը, ըստ այդ կառույցի ղեկավարի, ապաքաղաքական է։
Սա այն դեպքում, որ որպես արտգործնախարարության հոմանիշ օգտագործվում է «արտաքին քաղաքական գերատեսչություն» արտահայտությունը, տո հենց ԱԳՆ կայքում էլ։
Հիմա կասեք. «Կոնտեքստից կտրել ես, ինքը հետո շեշտել է, որ ներքաղաքականը նկատի ունի»։
Դե, թո՛ղ ճիշտ ասեր, ես էլ կոնտեքստից չկտրեի։ Եթե ոչ դիվանագետը ԱՄԵՆ բառը ճիշտ և տեղին օգտագործի, ապա էլ ո՞վ։ Կարո՞ղ է այս մեկին էլ List.am-ից են պաշտոնի բերել...
Մեծ հաշվով սա ոչ թե «լեզվի սայթաքում է», այլ մի քիչ լղոզած հայտարարություն, որ ինքն ընդամենը հնազանդ կամակատար է. «Քարտուղար տղա եմ, ինչ ասեն, պիտի անեմ, շատ մի տոպկեք»։
Ինչը բացարձակապես զարմանալու չէ, քանի որ այլ մարդու Նիկոլն այդ պաշտոնի չէր բերի...»:
Հիշեցնենք, որ Արա Այվազյանը ԱԺ-ում Արտաքին հարաբերությունների հանձաժողովի հետ փակ հանդիպման արդյունքների վերաբերյալ իր խոսքում լրագրողներին հայտնել էր. «Հայաստանի արտաքին քաղաքական գերատեսչությունը մեր ինքնիշխանության և պետականության հիմնասյուներից մեկն է: Լինելով ապաքաղաքական կառույց՝ ունի մեկ հավերժական նպատակ. ամենօրյա աշխատանքով պաշտպանել Հայաստանի Հանրապետության և հայ ժողովրդի շահերը:
Ցանկացած փորձ հեղինակազրկելու այս կառույցը և ներքաշելու ներքաղաքական շահարկումների մեջ հարված է Հայաստանի պետականությանը, հատկապես այս օրերին, երբ ռազմական գործողությունների ավարտից հետո ողջ ծանրությունը և պատասխանատվությունը հետզհետե տեղափոխվում է արտաքին քաղաքականության և դիվանագիտության դաշտ»: