Հրապարակվել են Իրանում միջուկային ֆիզիկոսի սպանության մանրամասները

Իրանցի միջուկային գիտնականը երթեւեկել է զրահապատ մեքենայով, սակայն դուրս եկել դրանից, որից հետո սպանվել է հեռակառավարվող զենքից, հաղորդել է Fars իրանական լրատվական գործակալությունը:

Լրատվականի տվյալներով՝ նոյեմբերի 27-ին զրահապատ ավտոմեքենան տեղափոխում էր միջուկային գիտնական Մոհսեն Ֆախրիզադեին եւ նրա տիկնոջը Իրանի հյուսիսում՝ Մազենդերան նահանգի Ռոստամկոլա քաղաքից դեպի Աբսարդ բնակավայր, որտեղ եւ տեղի է ունեցել մահափորձը: Նրա մեքենան ուղեկցում էր իր անվտանգության ծառայության եւս երեք ավտոմեքենա:

Ավտոշարասյան առջեւից շարժվող անվտանգության մեքենան առաջ է անցել իրավիճակը ստուգելու համար: Սակայն այդ պահին, ինչպես նշում է պորտալը, Ֆախրիզադեի ուշադրությունը շեղել են մեքենայի ուղղությամբ կրակոցների ձայները, որոնք, ըստ նրա, շարժչի խնդրի կամ ինչ-որ խոչընդոտի բախվելու ձայներ էին:

Այդ պատճառով նա դուրս է եկել ավտոմեքենայից, որից հետո նրա ուղղությամբ կրակ էին բացել հեռակառավարվող հրազենից: Ավտոմեքենան, որից կրակ էին բացել, կանգնած էր Ֆախրիզադեի մեքենայից 150 մետր հեռավորության վրա:

Գործակալության տվյալներով երկու փամփուշտ դիպել են նրա մարմնի կողային հատվածին, մեկը՝ մեջքին, ինչի հետեւանքով վնասվել էր նրա ողնուղեղը: Ֆախրիզադեն իր մարմնով ծածկել է թիկնապահին, որը եւս ստացել է վնասվաքներ մի քանի փամփուշտի հետեւանքով: Այնուհետեւ Nissan-ը պայթել է, հաղորդում է ՌԻԱ Նովոստի-ն:

Գործակալության հաղորդմամբ՝ մահափորձն ընդամենը տեւել է երեք րոպե: Մեքենայի սեփականատերը լքել է երկիրը հոկտեմբերի 29-ին:

Միջուկային ֆիզիկոս Մոհսեն Ֆախրիզադեն զոհվել է Թեհրանի մերձակայքում մահափորձի հետեւանքով. նա ստացել էր լուրջ վնասվածք եւ մահացել հիվանդանոցում: Իրանի պաշտպանության նախարարությունը հաստատել է, որ սպանված գիտնականը նախարարության կից հետազոտությունների եւ նորարարությունների կազմակերպության ղեկավարն էր:

Նրա սպանությունը տեղի է ունեցել մեկ ուրիշ իրանցի միջուկային գիտնականի՝ Մաջիդ Շախրիարիի սպանության տարելիցի նախաշեմին (գիտնականը սպանվել էր 2010 թվականի նոյեմբերի 29-ին):

Իրանի փոխնախագահ եւ երկրի Ատոմային էներգիայի կազմակերպության ղեկավար Ալի Աքբար Սալեխին, մեկնաբանելով վերջին իրադարձությունները, հայտնել է, որ Ֆախրիզադեն զբաղվել է հիմնականում երկրի ուղղությամբ միջուկային հարվածի դեմ պաշտպանության հարցերով:

Իրանի արտաքին գործերի նախարար Մոհամադ Ջավադ Զարիֆը մատնանշել է գիտնականի սպանության մեջ Իսրայելի մասնակցության վկայությունները՝ կոչ անելով միջազգային հանրությանը դադարել երկակի ստանդարտների քաղաքականությունն ու դատապարտել «պետական ահաբեկչության» գործողությունը: Իրանի նախագահ Հասան Ռոհանին հայտարարել է, որ միջուկային ֆիզիկոսի սպանությունն անպատասխան չի մնա: Իսրայելի վարչապետ Բինյամին Նեթանյահուի գրասենյակն, ի պատասխան ՌԻԱ Նովոստի-ի հարցման, հայտնել է, որ չի մեկնաբանի Իրանի իշխանությունների հայտարարությունները Ֆախրիզադեի սպանության գործում հրեական պետության մասնակցության վերաբերյալ: