Պետական կառավարման համակարգում կա՞ մեկը, որ տեղյակ լինի սահմանների համար պատասխանատու լիազոր մարմնի պարտականություններից, թե՞ ոչ. Սարհատ Պետրոսյան

Պետական կառավարման համակարգում կա՞ մեկը, որ տեղյակ լինի սահմանների համար պատասխանատու լիազոր մարմնի պարտականություններից, թե՞ ոչ. մարդիկ ընկած Google Maps-ով փորձում են հասկանալ` որտեղով է անցնում մեր սահմանը: Այս մասին ֆեյսբուքյան իր էջում գրել է Կադաստրի պետական կոմիտեի նախկին նախագահ Սարհատ Պետրոսյանը:

«Այսօրվա կառավարության ու ԱԺ-ի նիստերն ահագին բան բացահայտեցին և հույս ունեմ շատերը կանեն իրենց եզրահանգումները, բայց դրանց դեռ կհասցնենք անդրադառնալ։

Մինչ այդ, մեկ անգամ էլ անդրադառնանք սահմաններին։

Ուղղակի ինձ հետաքրքիր է, պետական կառավարման համակարգում կա՞ մեկը, որ տեղյակ լինի սահմանների համար պատասխանատու լիազոր մարմնի պարտականություններից, թե ոչ։ Մարդիկ ընկած Google Maps-ով փորձում են հասկանալ որտեղով է անցնում մեր սահմանը:

Ես հասկանում եմ, հիմարաբար Կադաստրի կոմիտեի Գեոդեզիայի ու քարտեզագրության ՊՈԱԿ-ը անձնական մաղձի համար մի քանի ամիս առաջ փակած ղեկավարությունը դժվար թե կարողանա նման աջակցություն տրամադրել, բայց ամեն դեպքում ունեն պարտավորություններ, որի համար վճարվում են ու պահում մոտ հազար հոգանոց հիմնարկություն։

Փոխարեն մի խեղճ ու կրակ զինվորականի ուղարկեք, որ ռազմական քարտեզներով ինչ-որ բաներ փորձի բացատրել, ուղղակի բացեք Կադաստրի կոմիտեի մի կես տարի առաջ հաստատված կանոնադրությունը, որում գրված է.

«11. Կոմիտեի գործառույթներն են`

27) Հայաստանի Հանրապետության պետական սահմանի և վարչատարածքային միավորների սահմանագծման, սահմանազատման հետ կապված քարտեզագրական աշխատանքների իրականացում:

29) իր իրավասության սահմաններում Հայաստանի Հանրապետության վարչատարածքային միավորների և պետական սահմանի սահմանագծման (դելիմիտացիա) ու սահմանազատման (դեմարկացիա) աշխատանքներին մասնակցություն»»,- գրել է Պետրոսյանը:

Հիշեցնենք, որ նոյեմբերի 26-ին` օրվա երկրորդ կեսին, տեղեկություններ տարածվեցին, որ ադրբեջանցի տասնյակ զինվորականներ ներխուժել են ՀՀ ամենախոշոր` Սոթքի ոսկու հանքի տարածք, որի մի հատվածը, Քարվաճառի շրջանի` նոյեմբերի 25-ին Ադրբեջանին հանձնելուց հետո, գտնվում է ՀՀ Գեղարքունիքի մարզի տարածքում: Հաղորդվում էր նաև, որ ադրբեջանցիները կոտրել են Սոթք-Քարվաճառ մայրուղու վրա տեղակայված անցակետի` նախօրեին տեղադրված դարպասներն ու առաջ շարժվել:

Համացանցում տարածվել էին մի շարք տեսանյութեր, որոնք, թերևս, հաստատում էին տեղեկությունների իսկությունը: Տեղեկատվությունը հաստատել էին նաև Սոթքի համայնքապետը, դպրոցի տնօրենը, նաև` ԱԺ պատգամավորներ:

Վարչապետի խոսնակ Մանե Գևորգյանը սկզբում հերքել էր տեղեկատվությունը` հորդորելով սպասել պարզաբանումների: Ավելի ուշ ՀՀ ՊՆ-ն հայտարարել էր, որ դարպասները չեն կոտրվել, այլ Հայաստանի և Ադրբեջանի սահմանի վերջնական ճշգրտման հարցն է քննարկվում:

«Քանի որ Հայաստանն այդ ուղղությամբ Ադրբեջանի հետ սահման չի ունեցել մինչև հիմա, այսինքն ՀՀ-ից հետո եղել է Արցախը, հիմա սահմանագծի ճշգրտման խնդիր է առաջացել: Այդ աշխատանքներն են իրականացվում»,- «Արմենպրես»-ի հետ զրույցում այս մասին հայտնել էր ՀՀ ՊՆ տեղեկատվության և հասարակայնության հետ կապերի վարչության պետ Գևորգ Ալթունյանը:

Ավելի ուշ ՀՀ ԶՈւ Գլխավոր շտաբի պետի առաջին տեղակալ, գեներալ-լեյտենանտ Տիրան Խաչատրյանը հրավիրված մամուլի ասուլիսում հայտնել է, որ Սոթքի հանքի մի մասը պատկանում է կիսով չափ մեզ, կիսով չափ գտնվում է Ադրբեջանի տարածքում:

Հարցին, թե ադրբեջանական կողմից մտե՞լ են ներկայացուցիչներ Սոթքի հանքի տարածք, Տիրան Խաչատրյանը պատասխանել է. «Այո երեք դիրք են տեղադրել, այդ տարածքում, ընդ որում, մեկը` անմիջապես հանքի եզրագծով»: