Եթե ԱԳ նախարարը չգիտի՝ պատերազմը սկսվում է, երբ դիվանագիտությունը պարտվում է՝ ես ոչ մի սպասում չունեմ իրենից. Մարուքյան
Իշխանությունը ռազմական դրությունը հանելու հիմնավորում այլևս չունի։ Այս մասին այսօր՝ նոյեմբերի 26-ին, լրագրողների հետ զրույցում ասաց «Լուսավոր Հայաստան» կուսակցության ղեկավար Էդմոն Մարուքյանը։
«Ուզում եմ հիշեցնել ՊՆ-ի անվտանգության հանձնաժողովի երեկվա նիստը, որտեղ Գլխավոր շտաբի ներկայացուցիչն ասաց՝ այսօր էլ կարող ենք հանել ռազմական դրությունը, մենք մեր խնդիրները գիտենք։ Հիմա այսօր ԳՇ-ից ոչ մեկին չեն հրավիրել, հրավիրել են ՊՆ գլխավոր քարտուղարին, ումից պահանջում եմ, որ իր զեկույցում ներկայացնի գերիների փոխանակման գործընթացը երբ է սկսվելու, ներկայացնի քաղաքացիական անձանց գործընթացը երբ է սկսվելու, ինչ են անում, որ մեր գերիներին չխոշտանգեն եւ այլ հարցեր»,- նշեց նա։
Մարուքյան ասաց, որ մոբիլիզացված քաղաքացիական անձինք ասում են՝ «պետության հացն ենք ուտում ամեն օր, բայց ոչինչ չենք անում, թող զորացրեն, գնանք աշխատենք, տնտեսությունը խայտառակ վիճակում է». ««Եթե այդ անձանց կարիքը չկա՝ անիմաստ ծախս ինչո՞ւ է արվում նրանց համար»
Մարուքյանը շեշտեց, որ քաղաքացիների կողմից մեծ դժգոհություն կա՝ ռազմական դրության չվերացման առնչությամբ։
«Սահմանը չեն կարողանում հատել բոլոր նրանք, որոնք ունեն եւ հայկական անձնագիր եւ օրինակ՝ ռուսական։ Չեն կարողանում գնալ արտագնա աշխատանքի։ Առաջացել են տնտեսական լուրջ խնդիրներ»։
Նա ընդգծեց նաեւ, որ հերթափոխների խնդիր կա. «Զինծառայողների հարազատները գրում են, որ հերթափոխություն պետք է արվի, որը նույնպես թողնվել է»։
«Միայն եկել, ասում են՝ եկեք ռազմական դրությունը չհանենք կամ եթե հանենք, եկեք ցույցերը, երթերը թույլ տանք, բայց ռազմական դրությունը չհանենք», - ասաց խմբակցության ղեկավարը:
Անդրադառնալով վարչապետ Նիկոլ Փաշինյանի՝ հրաժարականի գործընթացին, Մարուքյանն ասաց, որ ռազմական դրության պայմաններում անվստահություն հայտնելու գործընթաց հնարավոր չի անել։
Նա նշեց, որ իրենք վարչապետին անվստահություն հայտնելու նախագիծ այս պահին չունեն. «Հետեւաբար իշխանությունը չպետք է սարսափի այդ գաղափարից։ Երբ կհանվի ռազմական դրությունը, դա էլ կքննարկենք»։
Էդմոն Մարությանն անդրադարձավ նաև ԱԳ նորանշանակ նախարարի հայտարարությանը, թե Դիվանագիտության մեջ ձախողում չենք ունեցել, ռազմադաշտում՝ ունեցել ենք:
Նորանշանակ ԱԳ նախարարն Արա Այվազյանն այսօր խայտառակ հայտարարություն արեց, եւ ես ոչ մի հույս չեմ կապում հայկական դիվանագիտության հետ, որի ղեկավարն այդ արտգործնախարարն է։ Այս մասին այսօր՝ նոյեմբերի 26-ին, լրագրողների հետ զրույցում ասաց «Լուսավոր Հայաստան» կուսակցության ղեկավար Էդմոն Մարուքյանը։
«Նա հայտարարել է, որ մենք պարտվել ենք ռազմի դաշտում, ոչ դիվանագիտության: Եթե այդ մարդը չգիտի, որ պատերազմը սկսվում է այն ժամանակ, երբ դիվանագիտությունը պարտվում է՝ ես ոչ մի ակնկալիք, ոչ մի սպասում չունեմ կոնկրետ իրենից», - նշեց պատգամավորը: