Ինձ վրա է ոչ միայն մինչև օրս տեղի ունեցածի, այլև հետագա զարգացումների պատասխանատվությունը. Նիկոլ Փաշինյան
Այսօր կառավարությունը հերթական նիստը սկսեց մեկ րոպե լռությամբ՝ հարգելով պատերազմում զոհվածների հիշատակը։ Այնուհետը Նիկոլ Փաշինյանը պաշտոնաթող նախարարներին շնորհակալություն հայտնեց ներդրած ջանքերի համար, իսկ նոր նախարարներին հաջողություն մաղթեց՝ ներկայացնելով նրանց:
«Մենք ապրում ենք չափազանց դժվար ժամանակներ, դա ծանրանում է նրանով, որ մեր բազմաթիվ հայրենակիցներ մեզ հետ չեն ապրում այսօր, բայց այսօրվա մեր հրամայականը հետևյալն է՝ մենք պետք է ապրենք ծանր ժամանակներն ու հաղթահարենք այդ ծանրությունը»,-ասաց նա։
Եվս մեկ անգամ Փաշինյանը նշեց, թե իր վրա է վերցնում ստեղծված իրավիճակի ամբողջ պատասխանատվությունը և նշեց՝ արտաքին ու ներքին կայունության ապահովումն ու իր հրապարակած ճանապարհային քարտեզի իրականացումը բացարձակ առաջնահերթություն են։ Բացի արցախցիների համար իրականացվող ծրագրերից, Փաշինյանն ասաց, որ առաջիկայում ուշադրության կենտրոնում են լինելու Սյունիքի ու Գեղարքունիքի՝ պատերազմից տուժած բնակավայրերի վերականգնումը:
Նա նաև առաջնահերթություն համարեց անհետ կորածների որոնողական աշխատանքներն ու գերիների փոխանակումը։ «Պետք է ստեղծել բարեփոխումների հետագա շարունակական երաշխիք, ընդ որում, օրակարգը պետք է ընդլայնվի։ Պետք է տեղի ունենա կատարվածի պատճառների վերհանման, պարզաբանման ու վերլուծության գործընթաց, և հայ հանրությունը պետք է ստանա հստակ պատասխաններ, թե ինչ է տեղի ունեցել և ինչու։ Մեր ամենակարևոր անելիքը ՀՀ քաղաքացիների՝ սեփական երկրի ու իրավիճակի տերը լինելու ու փաստի պահպանումն է ու այս հանգամանքի ինստիտուցիոնալ հզորացումը»,-ընդգծեց Փաշինյանը։
Նա ասաց, թե ՀՀ քաղաքացին պետք է որոշի, թե ապագան ում հետ պետք է կառուցի։ «Մենք պետք է թույլ չտանք, որ ապագայի հավատը սպանվի»,-հավելեց նա: