Փաշինյանն անհետ կորածների ծնողների հետ հանդիպմանն ասել է, որ կարևոր հանդիպում ունի. շարունակել է Ավինյանը (Տեսանյութ)

Անհետ կորած զինծառայողների ծնողները, որոնց մի մասը երեկ հանդիպում է ունեցել Նիկոլ Փաշինյանի հետ, Հայաստանում ՌԴ դեսպանատան մոտ էին՝ օգնություն խնդրելու դեսպանից:

Լրագրողների հետ զրույցում ներկաներից մեկն ասաց, որ վարչապետի հետ հանդիպումը գոհացրել է, բայց չի բավարարել. «Նրա հետ այդքան երկար հարցուպատասխան չի եղել, զրույցը եղել է 40-45 րոպե:

Դրանից մի քանի րոպեն նա ներողություն խնդրեց, հետո մի քանի հարց ա տրվել: Դրանից հետո նա ասաց, որ շտապում է կարևոր հանդիպման, որը վերաբերում է մեր հարցին: Դրանից հետո փոխվարչապետ Ավինյանի հետ եղավ մնացած զրույցը: Մոտ 3 ժամ տևեց զրույցը: Շատ հարցեր են բարձրացվել: Օրինակ, մենք ասում էինք, որ վիրավոր կամ շրջափակման մեջ ընկած տղերք կան, որ պետք է իրենց օգնության հասնել, մարդիկ պատճառաբանում էին, որ այդ տարածքները հիմա Ադրբեջանի հսկողության տակ է, մենք չենք կարող: Ես էլ ասացի, որ այդպես չի, եղել է դեմք, որ անմիջապես իմ հետ է կապված, որ ինձ զանգել է եղբորս տղա ամսի 10-ին եւ ասել, որ շրջափակման մեջ ենք ընկել: Ես երեք րոպե հետո դա փոխանցել են գորիսի ռազմական ոստիկանություն: Անգամ այդ ժամանակ չեն արել որեւէ գործողություն, որ էդ երեխեքին անտառներից հանեն»,-ասաց նա: