Եղիսաբեթ II-ը գործարկել է սեփական մակնիշի ջինի արտադրություն
Բրիտանիայի թագուհի Եղիսաբեթ II-ը գործարկել է սեփական մակնիշի ջինի արտադրություն, հայտնում է Daily Mail-ը։
Պարբերականի տեղեկություններով՝ 42 աստիճան թնդության խմիչքը կոչվում է Sundringham Celebration Gin։ Այն պատրաստվում է բուսական համեմունքների հիմքով, որոնք աճեցվում են Անգլիայի արեւելքում գտնվող Նորֆոլք կոմսության Սանդրինգեմ կալվածքի տարածքում։
Խմիչքի շշալցմամբ զբաղվում է Whatahoot ընկերությունը, որը հիմնվել է 3 տարի առաջ բիզնեսմեն Ջեյմսոն Քրաունի եւ նրա կնոջ՝ Նիկիի կողմից։ Ջինը կարելի է ձեռք բերել կալվածքի կայքում։ 0,5 լ տարողությամբ շշի գինը կազմում է 50 ֆունտ (66,6 դոլար)։ Մեծ Բրիտանիայի բնակիչները կարող են օգտվել անվճար առաքման ծառայությունից։ COVID-19 կորոնավիրուսի պատճառով մտցված սահմանափակումները հանելուց հետո ջինը վաճառվելու է պալատի կողքին գտնվող հուշանվերների կրպակում։
Պարբերականը հայտնում է, որ խմիչքի բույրում առկա են մրտենու եւ արմավենու նոտաներ, որոնք աճեցվում են կալվածքի տարածքում։ Պիտակի գրության մեջ նշված է, որ ջինն ունի վառ արտահայտված գիհիի եւ ցիտրուսայինի հետհամյա երանգների հագեցած համ։
Daily Mail-ը նշում է, որ սա ջինի երրորդ ապրանքանիշն է, որ վաճառում է թագավորական ընտանիքը։ Ամռանը վաճառահանվել էր էքսկլյուզիվ չոր ջին՝ պատրաստված Բուքինգեմյան պալատի այգիներում աճեցվող բաղադրամասերից։ Այն պատրաստվում է ալոճենու հատապտուղների, կիտրոնային աղավնիճի եւ թթի տերեւների հիմքով։ Միապետի ընտանիքն այդ ժամանակ ջինի վաճառքը սկսել էր իր տարեկան եկամուտի մինչեւ 22 մլն դոլարի հնարավոր կորստի ֆոնին՝ Բուքինգեմյան պալատ զբոսաշրջիկներ չլինելու պատճառով։ Մի քանի շաբաթ առաջ թագուհու ավագ որդի արքայազն Չարլզը գործարկել էր սեփական մակնիշի ջինի արտադրությունը, որը կոչվում է Highgrove։ Խմիչքը պատրաստվում է հազվագյուտ օրգանական ցորենից, որն աճեցվում է Գլոսթերշիր կոմսությունում արքայազնի տնային ֆերմայում։