Արցախում ականի պայթյունի հետևանքով վիրավորվել է ռուս սպա և ԼՂ ԱԻՊԾ 4 աշխատակից

Լեռնային Ղարաբաղում զոհվածների մարմիններ փնտրելիս տեղի ունեցած ականի պայթյունի հետևանքով վիրավորվել է ռուս խաղաղապահ ուժերի սպան: Այս մասին հայտնում է ТАСС գործակալությունը՝ հղում անելով ՌԴ ՊՆ-ին:

Նշվում է, որ պայթյունի հետևանքով մահացել է Ադրբեջանի Զինուժի մեկ սպա: Լեռնային Ղարաբաղի Արտակարգ իրավիճակների պետական ծառայության 4 աշխատակիցներ նույնպես վիրավորվել են:

Գերատեսչության տվյալներով՝ նոյեմբերի 23-ին զոհված զինծառայողների մարմինների փոխանակման հարցով համատեղ խումբը, որը կազմված է ռուս խաղաղապահների, Ադրբեջանի Զինված ուժերի և Լեռնային Ղարաբաղի ԱԻՆ-ի և Կարմիր խաչի միջազգային կոմիտեի ներկայացուցիչներ, զոհվածների մարմիները որոնելիս է եղել Թարթառի շրջանում:

«Մատաղիս բնակավայրում աշխատանքներ իրականացնելիս պայթյուն է տեղի ունեցել: Պայթյունի հետևանքով ռուս խաղաղապահական զորախմբի սպան վիրավորում է ստացել: Ադրբեջանի Զինուժի մեկ սպա մահացել է: Լեռնային Ղարաբաղի ԱԻՆ 4 աշխատակիցներ ևս տարբեր աստիճանի վիրավորումներ են ստացել: Ռուս սպան տեղափոխվել է Բաքվի հիվանդանոց, որտեղ նրան անհրաժեշտ բուժօգնություն է ցուցաբերվել: Կյանքին սպառնալիքներ չկան»,- աղբյուրի փոխանցմամբ՝ ասվում է ՊՆ հաղորդագրության մեջ:

Հիշեցնենք, որ Նիկոլ Փաշինյանը նոյեմբերի 10-ին ստորագրել է եռակողմ հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը, բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։

Ըստ այդ հայտարարության՝ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա: ՌԴ խաղաղապահների տեղակայումն Արցախում արդեն ավարտին է հասցվել: