Չենք կարող տվյալներ տրամադրել գերեվարված անձանց քանակի վերաբերյալ. կողմերը չեն տրամադրել ամբողջական ցանկերը, որ հասկանանք՝ որքան անձինք են պահվում այս ու մյուս կողմում. Զառա Ամատունի

Մենք չենք կարող տվյալներ տրամադրել գերեվարված անձանց քանակի վերաբերյալ: Այս մասին Tert.am-ի հետ զրույցում ասաց Կարմիր Խաչի հայաստանյան գրասենյակի մամուլի պատասխանատու Զառա Ամատունին՝ անդրադառնալով հարցին, թե Ադրբեջանում գերեվարված քանի՞ անձ կա՝ զինծառայող և քաղաքացիական անձ:

«Մենք այցելում ենք գերիներին, որոնք պահվում էին թե՛ մինչև սեպտեմբերի 27-ը, թե՛ դրանից հետո են գերեվարվել: Սակայն ամբողջական պատկերացում նաև մեզ մոտ չկա, որովհետև կողմերը չեն տրամադրել ամբողջական ցանկերը, որ մենք հասկանանք՝ որքան անձինք են պահվում այս ու մյուս կողմում»,-նշեց Ամատունին՝ հավելելով, թե չեն կարող տվյալներ տրամադրել նաև, թե ԿԽՄԿ-ն քանի գերեվարված անձի է այցելել՝ ելնելով ԿԽՄԿ աշխատանքի ձևաչափից:

Հարցին էլ՝ արդյոք կա՞ ողջամիտ ժամկետ, որի ընթացքում պետք է կատարվի գերիների վերադարձը, Ամատունին պատասխանեց, որ ժամկետները որոշում են կողմերը:

«Այսինքն՝ գոյություն ունեն որոշակի պայմանավորվածություններ, որոնք ձեռք են բերվել քաղաքական բանակցությունների շրջանակներում, սակայն ԿԽՄԿ-ն բանակցային գործընթացի մաս չի կազմում, այս առումով իրավասու չենք համարում ժամկետների հետ կապված մեկնաբանություն տալ»,-ասաց նա:

Ամատունին հիշեցրեց, որ հոկտեմբերի 28-ին ԿԽՄԿ-ն օգնել է Ադրբեջանից ՀՀ տեղափոխել մեկ քաղաքացիական անձի, իսկ նոյեմբերի 1-ին ՀՀ է տեղափոխվել տարեց տղամարդու դի:

Հիշեցնենք, որ Նիկոլ Փաշինյանը նոյեմբերի 10-ին ստորագրել է եռակողմ հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը, բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։

Ըստ այդ հայտարարության՝ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա: ՌԴ խաղաղապահների տեղակայումն Արցախում արդեն ավարտին է հասցվել: