Այո, ես պատրաստ եմ ինձ վրա վերցնել պատասխանատվություն, բայց ես չեմ ասել, որ պատրաստ եմ լինել վարչապետ. Վանեցյան (Տեսանյութ)

Ես հույս ունեմ, որ Ռուսաստանի հետ Հայաստանի իշխանությունները գոնե այս ժամանակահատվածում, երբ դեռևս հանդիսանում են իշխանություն, կարողանան որոշակի հայանպաստ պայմաններ ապահովել բանակցային գործընթացում: Այս մասին, այսօր՝ նոյեմբերի 21-ին, Ազատության հրապարակում հանրահավաքից հետո լրագրողների հետ զրույցում նշել է «Հայրենիք» կուսակցության ղեկավար Արթուր Վանեցյանը:

Անդրադառնալով նախարարների փոփոխություններին, Վանեցյանն ասել է. «Ես երեկ արդեն ասել եմ, որ բոլոր նրանք, որոնք համաձայնվում են հեռացող դավաճանական իշխանության հետ շարունակել պատասխանատվությունը վերցնել, ուղղակի դավաճաններ են: Ես կոչ եմ արել որևէ նորմալ մարդու չհամաձայնել ստանձնել այսօր տարբեր բարձր պաշտոններ»:

Հարցին, թե նկատո՞ւմ է ՌԴ-ի կողմից աջակցություն Հայաստանի այսօրվա իշխանություններին, «Հայրենիքի» ղեկավարը պատասխանել է. «Ես չեմ ուզում նկատել ոչ Ռուսաստանի, ոչ այլ երկրների կողմից աջակցություն մեր իշխանություններին: Մենք ինքնիշխն երկիր պետք է լինենք»:

ՀՅԴ ԳՄ ներկայացուցիչ Իշխան Սաղաթելյանը նկատել է, որ կարևորը է, որ վարչապետը հայ ժողովրդի աջակցությունն ունենա, որն այս պահին չունի:

Վանեցյանը նորից անդրադարձել է Իջևանում բողոքի ցույցերին՝ ասելով. «Ես ավելի մանրամասներ կարող եմ պատմել: Հիշո՞ւմ եք, որ եղան այդ զանգվածային անկարգությունները եւ շատերը ասում էին՝ ի՞նչ գործ ունի ԱԱԾ տնօրենը այդտեղ: Շատ պարզ պատճառով: Ես այդ օրը աշխատանքային այցով գտնվում էի Արցախում, երբ զանգահարեց Վալերի Օսիպյանն ու ասաց, որ վիճակը լարված է Իջեւանում: Այնուհետեւ սկսեց զանգահարել իմ տեղակալը՝ Էդուարդ Մարտիրոսյանը: Նա ասաց, որ վարչապետը հանձնարարել է, որ «Ալֆա» ջոկատայիններին տանենք, որ ժողովրդին ծեծեն: Ես ասացի՝ այդպիսի բան չաենք, որովհետեւ այդ վարչությունը նախատեսված է այլ գործառույթների համար՝ հակաահաբեկչական: Նիկոլ Փաշինյանը զանգում էր ինձ, Օսիպյանին, ասում էր՝ ջարդեք, սատկացրեք, սպանեք, արյան գետեր եմ ուզում տեսնել: Պատասխանում էինք, որ չի կարելի»:

Հարցին, թե ունի՞ ապացույցներ, Վանեցյանն ասել է. «Իմ խոսքն ապացույց է, կարծում եմ՝ Օսիպյանի խոսքն էլ է ապացույց լինելու: Մեկնեցինք այնտեղ և իմ ու Օսիպյանի աշխատանքի արդյունքում, որ չտրվեցինք ապօրինի հրամաններին, չիրականացրեցինք այդ միջոցառումը: Կարողացանք առանց արյան գետերի կանխել այն, ինչ իրականցնում էին Իջեւանի եւ հարակից գյուղերի բնակիչները»:

Վանեցյանը հիշեցրել է, իր հրաժարականի տեքստը, որտեղ ասում էր՝ «Կանգ առեք»: «Այն ինչ ասել եմ, իրողություն է դառնում. կորցրեցինք Արցախի 70 տոկոսը, ունեցանք շուրջ 5 հազար զոհ, կովիդի րդյունքում ունեցանք 1500 զոհ, ունենք փլուզված տնտեսություն: Դոլարի կուրսը տեսե՞լ եք ուր է հասել՝ 508 դրամ: Դքւք հասկանո՞ւմ եք, որ տնտեսությունը քանդվում է, երկիրը քանդվում է: Արդեն էլ տեղ չունենք, օդանավերը սկսեցին թռչել, ազգի 50 տոկոսը արտագաղթելու է: Մենք անընդհատ ասել ենք, որ էս մարդիկ սուտ են ասում: Ասում էին՝ ով Նիկոլի հետ չի, դավաճան է, հիմա տեսա՞ք, ով է դավաճան: Ես նիկոլին հավատացել եմ, ուզեցել եմ, որ էս երկիրը նորմալ երկիր դառնա, բայց երբ տեսել եմ, որ չի կարում կառավարի, ասել եմ՝ Նիկոլ կանգ առ, ու դուրս եմ եկել»:

Անդրադառնալով նախօրեին ցուցարարների ցրելու ոստիկանության գործողություններին, Վանեցյանն ասել է, որ քանի որ Նիկոլ Փաշինյանը լավ գիտի հանրահավաք կազմակերպելու տեխնոլոգիաները, հավանաբար լավ գիտի նաեւ դրանք խանգարելու տեխնոլոգիաները. «Հենց առաջին օրվանից բիրտ ուժ է կիրառում, որ մարդիկ վախենան, դուրս չգան փողոց, բայց չես կարող: Կարող ես երկարաձգել, բայց չեն կարող անվերջ մարդկանց վախեցնել»:

«Հայրենիքի» ղեկավարը անդրադարձ է կատարել նաև վերջին պատերազմին.

«Պատերազմի 3-րդ, 4-րդ օրը ԳՇ պետը զեկուցել է երկրի ղեկավարին, որ մենք ունենք խնդիր, չենք կարողանալու դիմակայենք այս ագրեսիային: Նիկոլ Փաշինյանը փոխանակ ստացած տեղեկությունները վերլուծի եւ կայացնի որոշում, ինչպես միշտ որոշում չի կայացրել: Փաշինյանը 44 օր հեռուստատեսությամբ թերթերով խաբեց, ասելով՝ հաղթելու ենք: Փաստը եղավ այն, որ ունեցանք այս խայտառակ պարտությունը: Փաշինյանն ասում է, որ Շուշիի մասով միշտ եղել է պահանջ Ադրբեջանի կողմից, դրանից հետո ԱԳՆ խոսնակը գրառում է անում եւ հերքում Փաշինյանի ասածը, որցի հետո ԱԳ նախարարը հրրաժարական է տալիս: Այսինքն Շուշին ի սկզբանե չի եղել, եղել է հետո: Նաեւ ասում է, որ ինձ առաջարկում էին 7 շրջան հետ տալ, այսպես կոչված Լավրովի պլան կամ Մադրիդյան սկզբունքներ: Համաձայն չէի՞ր, վեր կենային, ժողովրդի դիմաց, ասեիր՝ ինձ սենց առաջարկություն են արել, ես համաձայն չլինելով դրա հետ, հիմա հրաժարականի դիմում եմ ներկայացնում եւ գնում եմ: Թող գան մարդիկ, որոնք համաձայն են այդ շրջանները տալով հարցը լուծեն: Հիմա եթե դու դա չես արել, հիմա քո մնալու իմաստը ո՞րն է:

Հլա Նիկոլի գնալուց հետո դեռ պետք է հասկանանք, թե ով է այդ մարդը, որ Նիկոլի գնալուց հետո վերցնելու է պատասխանատվությունը եւ այս փլուզված երկիրը փորձի ոտքի կանգնեցնել»:

«Այո, ես պատրաստ եմ իմ վրա վերցնել պատասխանատվություն, բայց ես որտեղ կլինեմ այս մեր երկրի փրկության գործընթացում, մենք կորոշենք բոլորս: Ես չեմ ասել, որ պատրաստ եմ լինել վարչապետ: Ես ասել եմ, որ պատրաստ եմ վերցնել իմ վրա պատասխանատվություն»,-ասել է նա: