Իշխանապահպանությունը Նիկոլ Փաշինյանի և նրա վարչակազմի համար դարձել է «իդեաֆիքս» և դրա համար օգտագործում է ցանկացած գործիք. Վլադիմիր Մարտիրոսյան
Այս իշխանության կողմից մենք խնդիրների ընկալում և լուծում չենք տեսնում, մենք տեսնում ենք գործողություններ, իմ կարծիքով՝ այլևս վերջացած իշխանության կողմից, որը փորձում է դրանով քիչ թե շատ երկարաձգել իր կենսունակությունը, որն արդեն հնարավոր չէ անել: Այս մասին Tert.am-ի հետ զրույցում ասել է քաղաքագետ, «Մեկ Հայաստան» կուսակցության համահիմնադիր Վլադիմիր Մարտիրոսյանը՝ խոսելով նախարարների հրաժարականների և Նիկոլ Փաշինյանի գործողությունների մասին:
«Հիմա ավելի շատ ոչ թե պետք է խոսենք այն մասին, թե իշխանության երկարաձգումը ինչ կտա Նիկոլ Փաշինյանին, այլ ինչ մեծագույն ռիսկեր է ստեղծում Նիկոլ Փաշինյանի կառավարման երկարաձգումը ՀՀ-ի համար: Կուզեի՝ մեր հասարակությունն այս ռիսկերի վրա ավելի շատ կենտրոնանար: Տարածաշրջանում կուտակված խնդիրները՝ անվտանգային, քաղաքական, ազգային տարբերի շահերի տեսանկյունից այնքան է լարված, որ ահավոր պայթյունավտանգ է: Որքանով է մեր ներկայիս իշխանությունն ունակ Հայաստանի համար կառավարել այս ռիսկերը, այս հարցի պատասխանը միանշանակ է. ոչ միայն ունակ չէ, այլ նույնիսկ կուտակված խնդիրները, որոնց կենտրոնում վարչապետն է՝ ռազմաքաղաքական և դիվանագիտական առումով, նա դրանց բարդությունն ու ծավալն էլ չի ընկալում»,-ասաց նա:
Ըստ Մարտիրոսյանի՝ երկրի ղեկավարի կողմից, հատկապես այդ շրջանում, մենք պետք է տեսնեիք առաջացած խնդիրների գնահատում, լուծման տարբերակներ, սակայն միայն տեսնում ենք, որ իշխանապահպանությունը Նիկոլ Փաշինյանի և իր վարչակազմի համար դարձել է իդեաֆիքս, և դրա համար օգտագործում են ցանկացած գործիք, ինչպես օրինակ՝ ֆեյքերի ինստիտուտը, էժան փիարը:
Մարտիրոսյանը նշեց, որ նախարարներին պաշտոնից ազատելու միջոցով վարչապետը փորձում է ստեղծված լարվածությունն իջեցնել, սակայն պետք է հասկանալ, որ պաշտոնանկությունը պատասխանատվությունից խուսափելու համար բավարար միջոց չէ, քանի որ հասարակության մոտ ամեն օր ավելի ու ավելի հարցեր են առաջանում և իշխանության կողմից այս հարցերին պատասխան չտալը խոսում է այն մասին, որ մենք գործ ունենք մի իշխանության հետ, որն ուղղակի քաղաքական տեսանկյունից անկարող է:
Խոսելով Դավիթ Տոնոյանի հրաժարականի մասին՝ Մարտիրոսյանը նշեց, որ այս ամենն արվում է Նիկոլ Փաշինյանի կողմից` «ինձ մի քիչ էլ ժամանակ տվեք» մտքով: «Որևէ մեկը որևէ ժամանակ չունի, որ Նիկոլ Փաշինյանին տա: Գոնե վերջին 100 տարվա մեջ տեղի է ունեցել մեր պետականության մեծագույն արհավիրքը: Պատվարժան կերպով պետք է պատասխանատվությունը կրել, այլ ոչ թե պատասխանատվությունը օտարել երկրորդային և երրորդային քաղաքական դերակատարների վրա, քանի որ նրանք նույնիսկ որոշումներ չեն կայացրել, ինչն էլ արել է բացառապես Նիկոլ Փաշինյանը»:
Վերջինս նշեց, որ Նիկոլ Փաշինյանն այլևս չունի այն իշխանությունը, որտեղ նա կարող է ինչ-որ խնդրի մեջ նույնիսկ որոշակի շեղումներ մտցնել: Նիկոլ Փաշինյանին պատասխանատվության է ենթարկելու քաղաքականությունը՝ իր օրգանական պրոցեսներով, իսկ հասարակությունը պետք է բախվի այն իրողության հետ, որն իրեն բերելու է այն կետին, որտեղից նա այլևս չի հավատալու, լեգիտիմացնելու, աջակցելու Նիկոլ Փաշինյանին: «Պրոցեսն այլևս սկսված է, Նիկոլ Փաշինյանն այլևս որոշող չէ այն հարցին, թե նա մնացող կամ գնացող է»:
Վարչապետի վերջին օրերի քայլերը Մարտիրոսյանը որակեց որպես հոգեվարք ապրող իշխանություն, և չկա այն իշխանությունը, որը Նիկոլ Փաշինյանն ուներ: