2018-ին Զանգակատան հատվածում կորցրած տարածքի պատճառով համայնքի 100 հեկտարից ավելի հողատարածք չի մշակվում

«Դեռևս 2018 թվականի ապրիլ-մայիս ամիսներին մենք Նախիջևանի հատվածում զիջել ենք բավականին մեծ տարածություն։ Մոտ 6 կիլոմետր հակառակորդը բարելավել է դիրքերը Զանգակատան հատվածում, մենք բնագծեր ենք կորցրել Արենի հատվածում։ Դավթյանը այդ ժամանակ եղել է հրամանատար։ Ես իրեն հարցրել եմ, ինքը այդ բոլորը թաքցրել է։ Ես եղել եմ բանակի Գլխավոր շտաբի պետ, բայց չեմ իմացել դրա մասին, մինչև անձամբ չեմ գնացել այդտեղ»,- այս մասին երեկ տեղի ունեցած ասուլիսի ժամանակ հայտարարել է ՊՆ ռազմական վերահսկողական ծառայության նախկին պետ, գեներալ-գնդապետ Մովսես Հակոբյանը՝ նշելով, որ այդ պատճառով ժամանակին վարչապետ Նիկոլ Փաշինյանին առաջարկել է Արտակ Դավթյանին չնշանակել Գլխավոր շտաբի պետ։

Զանգակատուն համայնքի ղեկավար Հովիկ Կարապետյանը «Առաջին լրատվական»-ի հետ զրույցում հաստատել է Հակոբյանի ասածը։ «Այո, 2018-ի գարնանը եղել է նման բան։ Առանց մարտական գործողությունների հակառակորդը առաջ է եկել, բայց չեմ կարող կոնկրետ ասել, թե ինչքան։ Որևէ մարտական գործողություն չի եղել։ Այլ հարցերի չեմ կարող պատասխանել, դրանք պաշտպանության նախարարության տիրույթում են»,- ասաց համայնքապետը։

Կարապետյանի խոսքով, սակայն, հակառակորդի այդ առաջխաղացման պատճառով ներկայումս Զանգակատուն համայնքի 100 հեկտարից ավելի հողատարածք չի մշակվում, քանի որ գյուղացիները կարող են հայտնվել հակառակորդի ուղիղ նշանառության տակ: «Դրանք մեր համայնքի վարելահողեր չեն եղել, բայց դրա պատճառով հիմա համայնքի վարելահողերը օգտագործել հնարավոր չէ, խոսքը մոտ 100 հեկտարի մասին է։ Վարելահողերը բավական մոտ են ներկայիս սահմանին։ Օդային տարածքով մոտ 600-800 մետր հեռավորության մասին է խոսքը»,- ասել է Զանգակատուն համայնքի ղեկավարը։