Զինվորական գործը փողոց փակել չէ. ջոկատներ ձեւավորելն ու առաջին գիծ ուղարկելը մեծ վնաս է հասցրել. Մովսես Հակոբյան
Եթե մեր բանակի անհաջողությունները մատուցվեին ըստ փուլերի եւ ժամանակացույցի, մեր ժողովրդի մոտ այսպիսի շոկային անակնկալ չէր լինի, որ մենք պարտվեցինք: Այս մասին «Արմնյուզին» տված հարցազրույցում նշեց Արցախի հերոս, գեներալ-գնդապետ, Արցախի ՊԲ նախկին հրամանատար, Հայաստանի ԶՈՒ գլխավոր շտաբի նախկին պետն ախկին գլխավոր ռազմական տեսուչ Մովսես Հակոբյանը:
«Հասարակությունը դրան կպատրաստվեր կամ, ինչու չէ, միջոցներ կձեռնարկեր, որպեսզի իրավիճակը շտկեր: Այս սուտը բոլորին հանգստացրել է, որ մենք հաղթում ենք եւ իմ մասնակցությունը կարեւոր չի: Երբ Արայիկ Հարությունյանն ասում է, որ 5 կմ է մնացել մինչեւ Շուշի, իսկ ՊՆ-ի լրատվականը հաղորդում է, որ դժողքի ձորում կոտորում ենք, հասարակ քաղաքացին մտածում է, որ մեր բանակը լավ կազմակերպված է եւ բոլորին ջախջախում է: Իսկ եթե ասեին, որ մենք չենք ջախջախում, նրանք հաղթահարել են այդ ձորը եւ թիկունքից մտել Շուշի, կարծում եմ, կհասկանային, թե Շուշին ինչի համար է ընկել»,-ասաց նա:
Մովսես Հակոբյանը դեմ է «դավաճան» բառը որեւէ մեկի նկատմամբ օգտագործելուն. «Դավաճանություն մեղսագրել ցանկացած մարդու դրա համար բավական հիմքեր պետք է ունենաս: Առանց քննության, առանց դատարանի որոշման անթույլատրելի է նման մեղք վերագրել որեւէ մեկին: Քո դատողությունները դեռ հիմք չեն»:
Դիտարկմանը, որ քաղաքական իշխանությունը մեղքը գցում է բանակի վրա, նա ասաց. «Եթե ուզում եք մեղավորներ գտնել, ապա այս պահը դրա համար հարմար չէ: Մեղավոր ենք մենք բոլորս, ցանկացած մարդ, զինվորական, ով կարող էր ինչ-որ բանով օգուտ տալ, բայց չի տվել, դրա համար մեղավոր է: Յուրաքանչյուր մարդ, ով հավատում են Աստծուն, պետք է գնահատական տա, թե ինչքանով է ինքը մեղավոր, որովհետեւ դա գիտի միայն ինքը եւ Աստված, մյուսները չգիտեն իր հնարավորությունները»:
Մովսես Հակոբյանը պնդեց երեկ ասուլիսում ասած միտքը, որ լրահամալրման առաջին փուլը, կասեցվել է. «Դա է կանգնեցվել, իսկ զորակոչը, զորահավաքը շարունակվել է, բայց ուրիշ նպատակներով, որի մի մասը, ըստ իս, մեծ վնաս է հասցրել, կոնկրետ ջոկատների ձեւավորումն ու առաջին գիծ ուղարկելը: Այդ մարդկանց պետք է պատրաստես, նրանց գլխին հրամանատարներ պետք է լինեն, որոնք զինվորական գործից հասկանում են: Զինվորական գործը փողոց փակել չէ»: