Սերգեյ Գավրիլով. Ռուսաստանը, Ադրբեջանը և Իրանը կարող են ջանքեր գործադրել, որպեսզի սիրիացի զինյալները լքեն Ղարաբաղը

Պետդումայի քաղաքացիական հասարակության զարգացման, հասարակական եւ կրոնական միավորումների հանձնաժողովի նախագահ Սերգեյ Գավրիլովը կոչ է արել Ադրբեջանին պահպանել Լեռնային Ղարաբաղի տարածքում գտնվող կրոնական սրբավայրերը եւ չփակել դրանց հասանելիությունը, հաղորդում է «ՌԻԱ Նովոստին»:

«Հուսով ենք, որ միջազգային իրավունքի սկզբունքների եւ հավատացյալների իրավունքների պաշտպանությանը համապատասխան՝ Ղարաբաղի կրոնական սրբավայրերն ու վանքերը կպահպանվեն: Ուխտագնացության համար անհրաժեշտ է ապահովել կրոնական սրբավայրերի՝ ինչպես մզկիթների, այնպես էլ քրիստոնեական եկեղեցիների հասանելիությունը: Ապահովելով անվտանգություն եւ ազատ մուտք դեպի կրոնական սրբավայրեր՝ Ադրբեջանը ցույց կտա իր քաղաքակիրթ լինելը»,- ասել է Գավրիլովը:

Ըստ նրա, այժմ Ղարաբաղում եւ ընդհանրապես Ադրբեջանին անցնող տարածքներում «կան մեծ թվով արմատական տրամադրված ծայրահեղականներ, որոնք եկել են Սիրիայից»:

«Ես տեսել եմ ահաբեկիչների գործունեության արդյունքները, հատկապես այն վայրերում, որոնք նրանք գրավում էին Սիրիայում հարձակման ժամանակ, առաջին հերթին Սուրբ Թեքլայի Մաալյուլի վանքում, որտեղ ոչնչացվել էր քրիստոնյա բնակչությունը, ավերվել էին վանքեր եւ տաճարներ: Ռուսաստանը, Ադրբեջանը եւ Իրանը կարող են անհրաժեշտ ջանքեր գործադրել, որպեսզի զինյալները հեռանան Ղարաբաղից»,- ընդգծել է խորհրդարանականը: Նա հույս է հայտնել, որ կձեւավորվի «հայ եւ ադրբեջանցի բնակչության խաղաղ համակեցության մոդել՝ Ղարաբաղի տարածքում եւ Ադրբեջանին անցած շրջաններում», եւ բերել է Ռուսաստանի օրինակը, որտեղ «կրթության, սոցիալական ծառայության եւ հայրենիքի պաշտպանության ոլորտում ավանդական փոխգործակցության հազվագյուտ փորձ է կուտակվել»: