«Այս ամենի համար այս դավաճանական թիմը պատասխան է տալու». Վահագն Վարագյանը դուրս է եկել ոստիկանության բաժնից

ԿԳՄՍ նախարարության դիմացից այսօր ոստիկանների կողմից բերման ենթարկված «Կանաչ ապագա» բնապահպանական շարժման ղեկավար Վահագն Վարագյանը դուրս է եկել ոստիկանության կենտրոնականի բաժնից և պատասխանել լրագրողների հարցերին:

«Գիտեք, որ ԿԳՄՍ նախարարին իմ քանի հարց ունեի. Առաջին հերթին, թե արդյոք ինքը կիսում է դավաճան Նիկոլ Փաշինյանի ստորագրած կապիտուլյացիայի փաստաթուղթը, որի հետևանքով մեր երկիրը ծանր խնդրի առջև է կանգնել: Ես չհասցրեցի այդ հարցն ուղղեմ նախարարին, ինձ բերման ենթարկեցին: Հաջորդ կարևոր հարցը, որի պատասխանը ուզում էի ստանալ նախարարից, հետևյալն է.

Մենք Շուշիում թողել ենք հսկայական ժառանգություն, որովհետև Շուշին մեր մշակութային քաղաքներից մեկն է, որտեղ բազմաթիվ թագարաններ կային: Այդ օրերին, երբ բանակը դիմակայում էր թշնամուն, Արայիկ Հարությունյանը ոչնչով չզբաղվեց, նույնիսկ Արցախի նախագահի կոչից հետո, որ թշնամին 5 կմ հեռավորության վրա էր, և այդ հսկայական ժառանգությունը քաղաքի հետ միասին գերեվարվեց, մնաց թուրքերին: Այս ամենի համար այս դավաճանական թիմը պատասխան է տալու»,-ասաց Վարագյանը՝ հավելելով, որ սա նաև նրա հետևանքն է, որ Արայիկ Հարությունյանի նմանները ՌԴ դեսպանտան առջև դրոշներ էին վառում:

Անդրադառնալով պնդմանը, թե եթե այդ հայտարարությունը չստորագրվեր 25 հազարանոց մեր բանակը կհայտնվեր շրջափակման մեջ, Վարագյանն ասաց. «Եթե մենք հարավում ունեինք 25 հազարանոց բանակ, ապա ինչպե՞ս թուրքերը հայտնվեցին Շուշիում: Այս դավաճանները վաճառել են մեր հայրենիքը և ի վերջո, պատասխան են տալու: Իրենք իրենց գերդաստաններով այդ դավաճանական պիտակին արժանացել են:

Արայիկ Հարությունյանը ոչ մի տեղ չի փախչելու, այդ հարցերին պատասխանելու է և արժանանալու է ժողովրդի պատժին»:

Վարագյանը տեղեկացրեց, որ դեռ առավոտյան էին ոստիկաններն իրեն զանգել ու հրավիրել զրուցելու, ինչին ինքը պատասխանել է, որ զրուցելու ոչ մի բան չկա: Նա նաև նշեց, որ իր հետ բերման ենթարկված երկու հոգին դեռ ոստիկանությունում են: