Անատոլի Վասերման. Փաշինյանը պաշտոնից հեռանալու երկու ճանապարհ ունի՝ «օվկիանոսից այն կողմ» և «գերեզման»
ՀՀ վարչապետ Նիկոլ Փաշինյանն արագորեն կորցնում է իշխանությունը՝ այս պայմաններում դժվար չէ կռահել, թե ով է փոխարինելու նրան: Այս մասին FAN-ին տված հարցազրույցում ասել է քաղաքագետ, մտավորական Անատոլի Վասերմանը:
Քաղաքագետը համոզված է, որ կառավարության ղեկավարը պաշտոնից հեռանալու երկու ճանապարհ ունի՝ «օվկիանոսից այն կողմ» եւ «գերեզման»: Նրա կարծիքով, երկրորդ տարբերակն ավելի հավանական է՝ չէ որ «սորոսականները» շատ գաղտնիքներ ունեն, եւ նրանք, ովքեր բռնվելու վտանգի տակ են, սովորաբար մինչեւ դատը չեն ապրում։
Մտավորականը կարծում է, որ վարչապետը չի կարող թաքնվել ժողովրդական դժգոհությունից, նա հիշեցրել է, որ Սերժ Սարգսյանի ղեկավարությամբ Հայաստանի նախորդ կառավարության տապալման համար «ընդամենը մի երկու հազարանոց ցույց» պահանջվեց, ինչը ստեղծեց «գեղեցիկ պատկեր հեռուստատեսությունում»:
Ինչ վերաբերում է իր իշխանությունը պահելու համար Փաշինյանի կողմից հնարավոր բռնության կիրառմանը, FAN-ի զրուցակիցը անորոշ արտահայտվեց՝ նշելով, որ նա «իհարկե կփորձի»:
«Սակայն ես չգիտեմ, թե անվտանգության կառույցներում քանի հոգի կաջակցի նրան այն բանից հետո, երբ նա նրանցից շատերին այդքան խայտառակ կերպով «գցեց»,- խոստովանել է Վասերմանը,- Ի վերջո, նա հեռացրեց չորս անձի անվտանգության ծառայությունների ղեկավարությունից, ինչպես նաեւ գեներալների մեծ մասին, ովքեր փորձ ունեին Ադրբեջանի դեմ ռազմական գործողություններում: Բացի այդ, նա ազատվեց գրեթե բոլոր նմանատիպ ծագմամբ քաղաքական գործիչներից եւ նրանց տեղը դրեց սատանան գիտի, թե ում: Նման պայմաններում ես շատ կասկածում եմ, որ Հայաստանի անվտանգության ծառայության որեւէ պաշտոնյա կշարունակի կատարել նրա հրամանները»:
Քաղաքագետը համոզված է, որ երբ Հայաստանը «ազատվի» Փաշինյանից, նրա փոխարեն կգան հենց նրանք, ում նա այս տարիների ընթացքում ջանասիրաբար «մաքրել է» երկրի ղեկավար կառույցներից՝ նախկին վարչապետ Սարգսյանի կողմնակիցները:
«Այս մարդիկ քիչ թե շատ խաղաղ հեռացան, քանի որ չէին ուզում իրենց համաքաղաքացիների արյունը թափել,- հիշեցրել է մտավորականը: «Բայց, ի վերջո, ինչպես հիմա տեսնում ենք, շատ ավելի շատ արյուն թափվեց, եւ հանրապետության համար բացարձակապես անօգուտ»: