Վրաստանում ընդդիմությունը նոյեմբերի 8-ին բողոքի ցույցեր է նախապատրաստում Թբիլիսիում և Բաթումիում
Ընդդիմադիր կուսակցությունները կոչ են անում քաղաքացիներին միանալ Թբիլիսիում եւ Բաթումիում նոյեմբերի 8-ին ժամը 15:00-ին նախատեսված բողոքի ցույցերին, փոխանցում է «Նովոստի-Գրուզիա»-ն:
Հոկտեմբերի 31-ին Վրաստանում խորհրդարանական ընտրություններ տեղի ունեցան, որոնց արդյունքներն ընդդիմությունը կեղծված է համարում եւ պահանջում է ոչ լեգիտիմ ճանաչել: Ի նշան բողոքի` խորհրդարան մտած ընդդիմության բոլոր յոթ կուսակցություններն ու դաշինքները, ըստ նախնական տվյալների, արդեն հուշագիր են ստորագրել, որով հրաժարվում են իրենց մանդատներից:
Ընդդիմությունը երեկ Թբիլիսիում երթ անցկացրեց Լեյբորիստական կուսակցության գրասենյակից դեպի Գրմագելե մետրոյի կայարան, որի մասնակիցները քաղաքացիներին թռուցիկներ բաժանեցին` «Սա կեղծիք է: Կիրակի Ժամը 3-ին խորհրդարանի առջեւ» գրությամբ:
Բողոքի ակցիայի մասնակիցները հայտարարում են, որ ԿԸՀ նախագահ Թամար Ժվանիան պետք է պատժվի` խորհրդարանական ընտրությունների կեղծմանը մասնակցելու համար: Նրանք կարծում են, որ հոկտեմբերի 31-ին Վրաստանի բնակչությունից գողացել են ընտրության իրավունքը: Նրանց հիմնական պահանջն արտահերթ խորհրդարանական ընտրությունների անցկացումն է երկրում:
Ինչպես նշել է «Եվրոպական Վրաստան» ընդդիմադիր կուսակցության առաջնորդներից մեկը` Իրմա Նադիրաշվիլին, կարեւոր է, որպեսզի կիրակի շատ քաղաքացիներ գան բողոքի ակցիային, որպեսզի «Վրացական երազանքի» առաջնորդ Բիձինա Իվանիշվիլին տեսնի, որ «ընտրությունների կեղծումը իրեն չի ներվի»:
«Կիրակի խորհրդարանի դիմաց պետք է շատ մարդ լինի: Դա անհրաժեշտ է, որպեսզի Բիձինա Իվանիշվիլին հստակ տեսնի, որ Վրաստանում ընտրությունների կեղծումը, ձայների գողությունն իրեն եւս երբեք չի ներվի: Եվ Իվանիշվիլին, եւ նրա ստրուկները պետք է իմանան, որ այս խորհրդարանը լեգիտիմ չի լինի: Այն չի արտահայտում ժողովրդի կամքը, ուստի ես մասնակցելու եմ բողոքի բոլոր ցույցերին: Ես պայքարելու եմ մինչեւ վերջ, որպեսզի Վրաստանում ժողովրդավարությունը չվերանա, չվերանա ընտրությունների միջոցով ինչ-որ բան փոխելու հեռանկարը»,- ասել է Նադիրաշվիլին:
Ինչ վերաբերում է Բաթումին, ապա այնտեղ երկրորդ օրն է հանրահավաք է անցկացվում ինքնավարության կառավարության շենքի դիմաց: Նախորդ օրը ցուցարարները եւս երթ էին անցկացնում Բաթումիում` «Բիձինա, հեռացիր», «Գործիր», «Ընտրությունները կեղծվել են» պաստառներով:
Բողոքի ցույցի առաջնորդները նախորդ գիշեր հայտարարել էին, որ հինգշաբթի օրվանից պատրաստվում են ժամանակավորապես դադարեցնել հանրահավաքը կառավարության տան մոտ եւ տեղափոխվել գյուղեր` կիրակի օրվա հանրահավաքին մասնկացության համար քաղաքացիներին մոբիլիզացնելու նպատակով: