Իրանը քանդում է ձևաչափը և բավարարո՞ւմ Թուրքիայի ախորժակը
Հայաստանի արտաքին գործերի նախարար Զոհրաբ Մնացականյանը, անդրադառնալով արցախյան հարցի կարգավորման վերաբերյալ իրանյան նախաձեռնությանը, նշել է, որ Իրանը ռեգիոնալ կայունության միտված կառուցողական և կարևոր խաղացող է, միաժամանակ նշելով, որ հակամարտության կարգավորման հաստատված ձևաչափը, սակայն, Մինսկի խմբի համանախագահությունն է: Ինչպես հայտնի է, Իրանի նախագահի հատուկ բանագնացի կարգավիճակով Երևան, Մոսկվա, Բաքու և Անկարա ճանապարհ ելած փոխարտգործնախարար Արագչին հայտարարել է Մոսկվայում, որ Մինսկի խումբը ցույց է տվել իր անարդյունավետությունը, և Իրանը առաջարկում է ռեգիոնալ ձևաչափի տարբերակը կարգավորման և կայունության համար: Այլ կերպ ասած, Իրանն ըստ էության առաջարկում է ստեղծել ՌԴ, Իրան, Թուրքիա և, բնականաբար, հակամարտ կողմեր ձևաչափ, համարելով, որ ռեգիոնալ խաղացողները կպայմանավորվեն ավելի հաստատուն և ավելի արդյունավետ: Սա նշանակում է, որ ձևաչափից դուրս են մնում ԱՄՆ-ն ու Ֆրանսիան: Հայաստանի արտգործնախարարի արձագանքը պարունակում է երկու կարևոր հանգամանք: Իրանը Հայաստանի համար շատ կարևոր, արժեքավոր գործընկեր է, որի դերը ռեգիոնալ զարգացումներում Երևանը գնահատում է կառուցողական և արդյունավետ: Մյուս կողմից, Երևանը չի ուզում հրաժարվել Մինսկի խմբի համանախագահության ձևաչափից, քանի որ այդ ձևաչափի մասնակից երկրները Հայաստանի համար պակաս կարևոր գործընկերներ չեն, և նրանք պակաս նշանակալի դեր ու ավանդ չունեն ռեգիոնալ կայունության հարցում:
Հայաստանի արձագանքի երկու շեշտադրումները շատ կարևոր են՝ Երևանը պատրաստ է գնալ կայունության ու խաղաղության միտված իրանյան առաջարկին ընդառաջ, աշխատել Իրանի հետ, սակայն այդ աշխատանքն ու առաջարկը չհակադրելով Մինսկի խմբի համանախագահության ձևաչափին: Այդ հակադրությունը որևէ լավ բան չի բերի ռեգիոնալ կայունության առումով, և, եթե Իրանը իր առաջարկը կառուցել է դրա վրա, ապա այդ առաջարկը, բացի առանց այդ էլ բարդ իրավիճակը խճճելուց, չի ունենալու որևէ այլ արդյունք: Բանն այն է, որ Իրանի ներկայացրած տրամաբանությունը, համենայնդեպս առերևույթ առայժմ եղած պատկերով, գործնականում այն է, ինչ ակնկալում է Թուրքիան և ինչի համար նաև Թուրքիան սկսել է պատերազմը: Այլ կերպ ասած, Իրանն առաջարկում է բավարարե՞լ Թուրքիայի ախորժակը՝ մոռանալով, որ ախորժակն ուտելուց է բացվում:
Աղբյուրը՝ 1in.am