Հումանիտար հրադադարը ԵԱՀԿ Մինսկի խմբի համանախագահների հեքիաթն է. Ռուդիկ Հյուսնունց

«Քաղաքակիրթ աշխարհը երես է թեքել մեզնից: Եթե գերմանիաները, եվրոպաները մտածում են, որ վաղը իսլամիստները չեն հասնելու իրենց, չարաչար սխալվում են», - նման կարծիք է «Առաջին լրատվական»-ի հետ զրույցում արտահայտել Արցախի Հանրապետության նախագահի գլխավոր խորհրդական-հատուկ հանձնարարություններով դեսպան Ռուդիկ Հյուսնունցը:

Ձեզ ենք ներկայացնում հարցազրույցն՝ ամբողջությամբ:

«– Պարոն Հյուսնունց, ինչպիսի՞ն է իրավիճակն առաջնագծում:

– Նույն վիճակն է, մենք մնացել ենք մենակ: Քաղաքակիրթ աշխարհը երես է թեքել մեզնից: Եթե գերմանիաները, եվրոպաները մտածում են, որ վաղը իսլամիստները չեն հասնելու իրենց, չարաչար սխալվում են: Անգելամերկելները և մնացածները, որոնք Եվրոպայի ջահակիրներն են, թող իրենց ականջներին օղ անեն, թող իմանան, որ նույն իսլամիստները րոպե առաջ հասնելու են իրենց, իրենց ընտանիքներին ու սրբություններին: Այնպես չէ, որ մենք ֆորպոստը հանձնում ենք, իրենք կարողանալու են այնտեղ խաղաղ ապրել: Սա համաշխարհային չարիք է: Թող աշխարհն իմանա, որ Արցախի հերոսական ժողովուրդը, որպես քրիստոնեական կղզի, իսլամիստների, տեռորիստների, ահաբեկիչների զոհ է դառնում, բայց հերոսական մարտեր մղելով, իրենց գոյի համար, իր սրբությունների համար, կանանց ու երեխաների համար: Մինչև վերջին փամփուշտը, մինչև վերջին մարդը կանգնած ենք: Իրենք թող հույս չունենան, թե մեզ մարսելուց հետո իրենց ախորժակը փակվելու է:

– Երեկ պաշտոնապես հայտարարվեց, որ թշնամին կարողացել է վերցնել Կուբաթլուն: Ի՞նչ իրավիճակ է հիմա:

– Իրենք ամեն օր հարձակվում են տարբեր տեղերից՝ Թուրքիայի կանոնավոր ինստրուկտորների, սպեցնազի, իսլամիստների միջոցով: Մենք մեր բոլոր հնարավոր և անհնար միջոցներով պայքարում ենք, որպեսզի մի թիզ հող չտանք: Մենք 2-3 օր կենաց-մահու կռիվ ենք տալիս, ու աշխարհի ականջը խուլ է, որևէ տեղից օգնություն չունենք: Եվ մենք դիմակայում ենք այս պատերազմին: Ես ուրիշ ասելիք չունեմ:

– Իսկ աշխարհի ականջն ինչո՞ւ է խուլ, ամեն դեպքում երեք անգամ հրադադար հաստատելու համար տարբեր պետություններ միջնորդեցին՝ Ռուսաստանը, Ֆրանսիան, ԱՄՆ-ը, բայց հումանիտար հրադադար կոչվածն այդպես էլ չեղավ:

– Հումանիտար հրադադարը ԵԱՀԿ Մինսկի խմբի համանախագահների հեքիաթն է: Ես չգիտեմ, թե իրենք որքանով են լուրջ ազդեցություն գործում Ադրբեջանի և Թուրքիայի վրա: Փաստն այն է, որ հրադադար չկա:

– Ինչպիսի՞ն է տրամադրությունն առաջնագծում:

– Անկեղծ ասած, մենք գիտենք, որ խուճապից փրկություն չկա, վախենալուց փրկություն չկա, միայն մարտնչելուց, դիմակայելուց, պայքարելուց կա փրկություն: Մենք դրա հետևից ենք գնում միմիայն: Համախմբված Արցախի գերագույն գլխավոր հրամանատարի շուրջը՝ թե՛ զինվորականներով, թե՛ ժողովրդով, թե՛ աշխարհազորով, բոլորս մեկ հոգի դարձած մարտնչում ենք»: