Պատերազմ եք գնում, բարո՛վ գնացեք․ Մարզպետներն ու քաղաքապետները մեկնում են ճակատ, ՏԻՄ աշխատանքը չի ձախողվի
Երեկ վարչապետ Նիկոլ Փաշինյանը կոչ արեց ՏԻՄ ղեկավարներին, գյուղապետներին, ՀԿ-ներին, կուսակցություններին ջոկատներ հավաքել։ Նաև նշեց, որ այնպես չէ, որ բոլորը պետք է դաշտային հրամանատար դառնան. երկրի կառավարելիությունը պետք է պահվի, սակայն բոլոր ուսանողները, բիզնեսմենները և մյուսները պետք է շտապեն զինվորագրվել։ Լոռու մարզպետարանում արդեն խումբ է ձևավորվում: Լուռու մարզպետ Անդրեյ Ղուկասյանը «Առաջին լրատվական»-ի հետ զրույցում նշել է, որ խումբը ձևավորելուց հետո կմեկնեն ռազմաճակատ:
Հարցին, թե եթե բոլոր համայնքապետները մեկնում են ճակատ, ՏԻՄ-երը խնդիր չե՞ն ունենա, նա պատասխանել է. «Կաշխատեն այն աշխատակիցները, որոնք կմնան, որևէ խնդիր չենք ունենալու: Իմ աշխատանքը կկատարի իմ կին տեղակալը»: Նա հավելեց, որ նրանք, ովքեր չունեն զինվորական կոչումներ, հավաքագրում են մինչև 50 տարեկանը, իսկ սպայական անձնակազմի դեպքում՝ մինչև 55 տարեկանը: Անդրեյ Ղուկասյանն ասաց, որ ինքը ծառայել է բանակում և սպա է, իսկ մինչև ռազմաճակատ մեկնելը բոլորը վերապատրաստում են անցնելու:
Գեղարքունիքի մարզպետ Գնել Սանոսյանն էլ նշեց, որ մարզում պրոցեսն ընթացքի մեջ է, և եթե ցուցում լինի, ինքն էլ կմեկնի:
Սպիտակի քաղաքապետ Գագիկ Սահակյանն էլ «Առաջին լրատվական»-ի հետ զրույցում նշեց, որ քաղաքում կամավորագրվում են, և մինչև վարչապետի կոչն էլ բազմաթիվ կամավորականներ եղել են ու գնացել են ճակատ, այդ կոչին չեն սպասել: Սպիտակի քաղաքապետը նշել է, որ իր գլխավորությամբ են տղաները մեկնելու առաջնագիծ:
«Տղաները մինչ այդ էլ գնացել են, որովհետև հասկանում են, որ իրենց կարիքը հայրենիքն ունի: Սա նոր բան չի, 2016-ի Քառօրյա պատերազմի ժամանակ ևս Սպիտակից կամավորականներ են եղել, այդ թվում՝ քաղաքապետարանի աշխատակիցներ:
Հարցին, թե եթե քաղաքապետը կամավորների հետ միասին մեկնի ճակատ, քաղաքապետարանի աշխատանքները չե՞ն ձախողվի, Գագիկ Սահակյանը պատասխանել է. «Ես չեմ կարող ասել, որովհետև առաջին անգամ եմ մեկնում ճակատ, բայց իմ տեղակալն ու աշխատակազմի ղեկավարը մնում են: Պատկերացրեք՝ արձակուրդ եմ գնացել: Այնպես որ, դրա մասին մի անհանգստացեք բացարձակ, աշխատանքը կկատարվի: Դե, եթե այնպես ստացվի, որ զոհվեմ, նոր ընտրություն կանեն: Այո՛, հոգեբանորեն դրան էլ եմ պատրաստ, բայց ես գնում եմ ապրելու և ապրեցնելու նաև ձեզ»: