Իսպանացի հանրապետականները բողոքի ցույցեր են կազմակերպել երկրի 24 քաղաքներում՝ ընդդեմ նախկին թագավորի
Կարմիր, մանուշակագույն եւ դեղին հանրապետական դրոշներով ցուցարարները կազմակերպել են ակցիաներ Իսպանիայի 24 քաղաքներում՝ պահանջելով պատասխանատվության ենթարկել երկրի նախկին թագավոր Խուան Կառլոսին, հաղորդում է Reuters-ը:
82-ամյա նախկին միապետն ապրում է Արաբական Միացյալ Էմիրություններում այս տարի օգոստոսին Իսպանիայից հեռանալուց հետո:
«Մենք հավաքվել ենք այստեղ, որպեսզի կոչ անենք պատասխանատվության ենթարկել նախկին թագավորին»,-հայտարարել է ցույցերի հարյուրավոր մասնակիցներից մեկը Սեւիլյեում:
Իսպանիայի նախկին թագավոր Խուան Կառլոսի նկատմամբ անցկացվում է հետաքննություն Իսպանիայում եւ Շվեյցարիայում կոռուպցիայի կասկածանքով, որը կապված է սաուդյան արագընթաց գնացի շուրջ իսպանական ընկերությունների՝ 6,7 մլրդ եվրո արժեքով պայմանագրի հետ:
Իսպանիայի Գերագույն դատարանի դատախազությունը դիտարկում է հետաքննությունը երկարաձգելու հարցը նախկին թագավորին պաշտոնապես մեղադրանք առաջադրելու համար:
Ինքը՝ Խուան Կառլոսը չի մեկնաբանել այդ տեղեկատվությունը՝ նշելով միայն իր փաստաբանի միջոցով, որ պատրաստ է համագործակցել դատախազության հետ անհրաժեշտության դեպքում:
Տեղեկատվական գործակալությունը նշում է, որ, համաձայն երկուշաբթի հրապարակված հարցման, իսպանացիների 40,9 տոկոսը կողմ է արտահայտվել կառավարման հանրապետական ձեւին, մինչդեռ 34,9 տոկոսը սատարել է միապետությունը, իսկ 24,2 տոկոսը դժվարացել է պատասխանել: