Կորոնավիրուսի դեմ չինական նոր BBIBP-CorV թեկնածու պատվաստանյութն անվտանգ է և իսկապես հանգեցնում է կորոնավիրուսի դեմ հակամարմինների ձևավորմանը
Կորոնավիրուսի դեմ չինական նոր BBIBP-CorV թեկնածու պատվաստանյութը, որը հիմնված է SARS-CoV-2 ինակտիվացված ամբողջական վիրուսի վրա, անվտանգ է եւ իսկապես հանգեցնում է կորոնավիրուսի դեմ հակամարմինների ձեւավորմանը: Դա հաստատել է ռանդոմացված կլինիկական հետազոտությունը, որի արդյունքները հրապարակվել են Lancet Infectious Diseases պարբերականում:
Հետազոտության մեջ մասնակցել է 18-80 տարեկան 192 կամավոր, եւ բոլորի մոտ գրանցվել է հակամարմինների ձեւավորմամբ իմունային պատասխան: 60 տարեկան եւ բարձր տարիքային խմբի կամավորների մոտ իմունային պատասխանը ձեւավորվել է դանդաղ. դա զբաղեցրել է միջինում 42 օր: 18-59 տարեկան մասնակիցների մոտ հակամարմիններ են հայտնաբերվել արդեն 28 օր անց: Տարեց մարդկանց մոտ հակամարմինների մակարդակը նույնպես ցածր էր (170.9՝ ի տարբերություն երիտասարդների շրջանում 228.7-ի):
Քանի որ փորձարկման նպատակը պատվաստանյութի անվտանգությունը, ոչ թե դրա արդյունավետությունը գնահատելն էր, դեռեւս հնարավոր չէ ասել՝ բավարար է արդյոք պատվաստանյութով պայմանավորված իմունային պատասխանը SARS-CoV-2-ով վարակվելուց պաշտպանվելու համար:
Նշենք, որ ներկայում անցկացվում են կորոնավիրուսի դեմ 42 կլինիկական պատվաստանյութի փորձարկումներ: Դրանց շրջանում կան ԴՆԹ-պլազմիդային պատվաստանյութեր, ինակտիվացված վիրուսներով պատվաստանյութեր, ադենովիրուսային վեկտորով, ՌՆԹ-պատվաստանյութեր, ինչպես նաեւ սպիտակուցային ենթամիավորումների հիման վրա, նաեւ վիրուսանման մասնիկներով պատվաստանյութեր:
BBIBP-CorV պատվաստանյութը հիմնված է վիրուսի օրինակի վրա: Վիրուսները մշակվել են լաբորատորիայում բջջային գծերի կիրառմամբ, որից հետո պաթոգենն ինակտիվացվել է քիմիական նյութի միջոցով, որը կոչվում է բետա-պրոպիոնոլակտոն: