Միհրան Ավդալյան․ սպա հոր դաստիարակած հայրենասեր ջանֆիդացին (Լուսանկարներ)

Ավագ լեյտենանտ Միհրան Ավդալյանի սխրագործության մասին շատ գրվեց․ նա, մասնակցելով մարտական դիրքերից մեկը հետ բերելու գործողությանը, շրջափակումից հանել էր 7 զինծառայողի ու արժանացել «Մարտական խաչ» 2-րդ աստիճանի շքանշանի։ Ջանֆիդայում դեռ հպարտությամբ իրենց համագյուղացու սխրանքն էին քննարկում, երբ լսեցին նրա մահվան գույժը։

Միհրանը զոհվեց շքանշանի ներկայացվելու հենց հաջորդ օրը՝ հոկտեմբերի 9-ին։ Վերջին անգամ հարազատների հետ այդ օրն էր խոսել։

«Միհրանը շատ լավ գիտակցում էր, որ պատերազմ, կռիվ է, թշնամին քանակով շատ է, բայց ինքն էնքան համարձակ էր, որ չէր էլ վախենում, միայն թե հայրենիքին օգուտ տար ու հենց էդպես էլ եղավ․․․ Մինչև վերջին շունչը պատվով է ծառայել հայրենիքին։ Ինքը գիտակցում էր, որ կարող է զոհվել, բայց մինչև վերջ կռվում էր»,- պատմում է Միհրանի հորեղբոր որդին՝ Արամայիսը։

Միհրանին հատուկ էր խիզախությունն ու անվախությունը։

«Կռվի օրերին ինքը շատ էր աչքի ընկել․ երբ գնացել էր Մատաղիսի իրենց տուն, 2 թուրքի էր տեսել, որոնք հանգստանում էին իր տանը, հենց էդտեղ էլ երկուսի լեշերը փռել էր գետնին»,- ասում է Արամայիսը։

Մատաղիսում ծառայելը Միհրանի ընտրությունն էր եղել․ Վազգեն Սարգսյանի անվան ռազմական ինստիտուտը 2016թ․-ին ավարտելուց հետո ինքնակամ ծառայության էր անցել այնտեղ։

«Ապրիլյան պատերազմի ժամանակ ինքը վերջին կուրսում էր, ավարտելուց հետո հայրենասիրությունից դրդված ուզեց հենց առաջնագծում ծառայել, նույնիսկ «ժերեբյովկային» չէր մասնակցել։ Ինքը շատ ուժեղ է կռվել, շատ խիզախ էր, էդ տարածաշրջանում թուրքերի սարսափն է եղել»,- նշում է Արամայիսը։

Միհրանը սպա հոր դաստիարակած հայրենասեր ջանֆիդացին էր։ Անունն էլ ժառանգել էր Հայրենական մեծ պատերազմի մասնակից՝ պապու եղբորից, որը ժամանակին հերոսի կոչման էր արժանացել։ Միհրանի հերոսության օրինակով էլ կմեծանան նրա որդիները, որոնցից կրտսերին նա, ցավոք, չհասցրեց տեսնել։ Փոքրիկ Ռոբերտը ծնվեց պատերազմի թեժ օրերին ու հոր որոշմամբ անվանակոչվեց ի պատիվ Արցախի հերոս Ռոբերտ Աբաջյանի։