Հայաստանում պարենային անվտանգության խնդիր չի առաջանա. ցորեն ներկրող երկիր ենք
«Պատերազմական իրավիճակով պայմանավորված՝ Արցախում և Հայաստանում՝ Տավուշի մարզում հացահատիկի բերքը, կարելի է ասել՝ ընդհանրապես չի հավաքվել, բայց պատերազմական այս իրավիճակում Հայաստանը պարենային անվտանգության խնդիր չի ունենա»,- «Առաջին լրատվական»-ի հետ զրույցում ասել է «Ագրոգյուղացիական միավորում» ՀԿ նախագահ Հրաչ Բերբերյանը։
Մեր զրուցակցի խոսքերով՝ Հայաստանը միշտ եղել է հացահատիկ՝ ցորեն ներկրող երկիր։ «Մենք եղել ենք, կանք ու կլինենք պարենային ցորենի ներկրող երկիր։ Մենք կարող ենք 40-50 տոկոս արտադրել, բայց միշտ էլ մնացած մասը ներկրվել է։ Հետևաբար` հիմա էլ կշարունակվի ներկրվել, ճանապարհները դեռ բաց են ու ոչ մի խնդիր չի կարող առաջանալ»,- ասաց Բերբերյանը՝ հավելելով, որ Հայաստանին անասնակերն էլ միասին անհրաժեշտ է 1 միլիոն 200 հազար տոննա հատիկային պաշար, որի մեջ մտնում է ցորենը, գարին։ Հայաստանը լավագույն դեպքում արտադրում է 400 հազար տոննա, մնացածը ներկրվում է՝ լինի ցորենի, թե ալյուրի տեսքով։
Ինչ վերաբերում է պարենային այլ ապրանքներին, ապա, մեր զրուցակցի խոսքերով, պարենային ստրատեգիական ապրանքներից կարտոֆիլի, սոխի խնդիր ևս չենք ունենա։ Նախկինում սոխը ներկրվում էր Պարսկաստանից, սակայն Հայաստանն ունի բավարար քանակի արտադրանք և կարող է սպառել իր արտադրանքը։ Կարտոֆիլի բերք, ըստ Բերբերյանի, ևս բավականաչափ ունենք և կկարողանանք հանրապետության ազգաբնակչությանն ապահովել։ «Էն որ գոռում էին՝ հեսա սով-մով կսկսվի, բան կլինի, չկա նման բան։ Դա բլեֆ է։ Մի քիչ պտղի խնդիր կա, որը միշտ եղել է։ Բայց խնդիրը կառաջանա ձմռան ամիսներին, և այդ ապրանքների ինքնարժեքը մի քիչ թանկ կլինի, ուրիշ ոչինչ»,- ընդգծեց Բերբերյանը։
Մեր զրուցակցի խոսքերով՝ բացի պատերազմական իրավիճակից, բնակլիմայական պայմանները ևս ազդեցին բերքի քանակի ու որակի վրա, բայց այդ պարագայում էլ և անգամ պատերազմի շարունակվելու դեպքում էլ Հայաստանը պարենային անվտանգության խնդրի չի բախվի։
Արտահանողների միության նախագահ Րաֆֆի Մխչյանը ևս կարծում է, որ պարենային անվտանգության ոչ մի խնդիր չի կարող առաջանալ, քանի որ սահմանները բաց են, բեռնատարները հանգիստ բեռներ են տեղափոխում։ «Տրանսպորտը գնում գալիս է, ոչ մի խնդիր չկա։ Բացի դրանից՝ մենք բավական պաշար ունենք, ու եթե նույնիսկ սահմանները փակվեն, ապա մենք մի քանի ամիս գոյատևելու պաշարներ ունենք։ Սակայն նման բան չկա սահմանների մասով, ոչ մի ավելորդ աժիոտաժ պետք չէ ստեղծել։ Ամեն ինչ սովորական իր հունով գնում է։ Ես հենց հիմա դեպի ԱՄՆ հայկական արտադրանքի ապրանք եմ արտահանում։ Հենց այս պահին։ Արտառոց ոչ մի բան չի եղել։ Մեր ճանապարհը հիմնականում Փոթիի նավահանգիստն է ու Պարսկաստանի սահմանը, և մենք այդ ուղղությամբ ոչ մի խնդիր չունենք ու անհանգստանալու որևէ պատճառ չկա»,- ասաց Մխչյանը։