Մեծ Բրիտանիայում գրանցվել է կորոնավիրուսի հետևանքով լսողության կորստի աշխարհում առաջին դեպքը

Մեծ Բրիտանիայում գրանցվել է կորոնավիրուսի հետևանքով լսողության կորստի աշխարհում առաջին դեպքը․ վիրուսի հետեւանքով տուժել է 45-ամյա տղամարդ, որի մոտ կար ասթմա և հիվանդացել էր COVID-19-ի ծանր ձևով, որը հաղթահարել էր։ Գիտնականները կարծում են, որ կորոնավիրուսը կարող է վնասել ներքին ականջի բջիջները։

University College London-ի մասնագետները այս կլինիկական դեպքը նկարագրել են WMJ Case Reports-ում։ Ասթմայով տառապող 45-ամյա պացիենտը հոսպիտալացվել էր COVID-19-ի ծանր ընթացքով եւ թոքերի արհեստական օդափոխության կարիք է ունեցել։ Բուժման ժամանակ պացիենտը ստացել է ներերակային ռեմդեսիվիր եւ ստերոիդներ։

Երբ պացիենտի վիճակը բարելավվել է, նրան վերակենդանացման բաժանմունքից տեղափոխել են սովորական հիվանդասենյակ, հայտնում է Medportal.ru-ն։ Բայց մեկ շաբաթ հետո նա սկսել է գանգատվել տինիտուսից՝ ականջներում զնգոց։ Եվս մեկ շաբաթ հետո պացիենտի ձախ ականջը խլացել է։ Անցկացված հետազոտություններով հայտնաբերվել է սենսոնեւրալ ծանրալսողություն, որն առաջանում է ներքին ականջի բորբոքմամբ։ Ստերոիդների միջոցով հաջողվել է պացիենտի լսողությունը մասնակի վերականգնել։

Հոդվածի հեղինակները նշել են, որ բուժման ընթացքում պացիենտի ընդունած դեղամիջոցներից ոչ մեկը չէր կարող դառնալ լսողության կորստի պատճառը։ Դրանից բացի, նախկինում այս տղամարդու մոտ լսողության հետ կապված ոչ մի խնդիր չի եղել։ Ուստի խնդրի առավել հավանական պատճառը հենց կորոնավիրուսն է եղել։

Առայժմ հայտնի չէ, թե ինֆեկցիան կոնկրետ ինչ մեխանիզմ է գործարկել, բայց մասնագետների խոսքով՝ հավանականություն կա, որ SARS-Cov-2-ը կարող է թափանցել ներքին ականջի բջիջների մեջ եւ դրանք ոչնչացնել։ Մեկ այլ վարկածի համաձայն՝ օրգանիզմն ինֆեկցիային ի պատասխան սկսում է ցիտոկիններ արտադրել, որոնք ներքին ականջի համար շատ տոքսիկ են։ Այս վարկածը հաստատում է ստերոիդների կիրառման արդյունավետությունը, որոնք նվազեցնում են բորբոքումը եւ ցիտոկինների արտադրումը։

Գիտնականների խոսքով՝ Մեծ Բրիտանիայում սա կորոնավիրուսային ինֆեկցիայի ֆոնին լսողության կորստի առաջին գրանցված դեպքն է, սակայն նման ախտանիշների մասին տեղեկություններ են եղել նաեւ ավելի վաղ։ Օրինակ՝ մայիսին Մանչեսթերից գիտնականների խումբը հրապարակել էր կատարած հետազոտության արդյունքները, որոնց համաձայն՝ կորոնավիրուսով 121 պացիենտից 16-ը հիվանդանոցից դուրս գրվելուց 2 ամիս անց գանգատվել էր լսողության հետ կապված խնդիրներից։