Վիրուսը սահման չի ճանաչում, այն հանգիստ կարող է թիկունքից տեղափոխվել առաջնագիծ. հոկտեմբերի 26-27-ին կունենանք 1400-1500 նոր դեպք
Կորոնավիրուսի դեպքերը գնալով շեշտակի աճում են։ Միայն երեկ արձանագրվել է վարակի 745 նոր դեպք։ Այսինքն՝ արված 2114 թեստի 35 տոկոսը դրական է եղել։ Կորոնավիրուսի դեպքերի թվի աճը խիստ մտահոգիչ է հատկապես պատերազմական այս օրերին, երբ հիվանդանոցները ծանրաբեռնված են առաջնագծից տեղափոխված վիրավոր զինծառայողներին բուժօգնություն ցուցաբերելու գործով։
ՀՀ ԱՆ Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Գայանե Սահակյանն «Առաջին լրատվական»-ի հետ զրույցում ասաց, որ այս ամսվա 14 օրերը, նախորդ ամսվա նույն ժամանակահատվածի հետ համեմատած, ունենք արդեն դեպքերի կրկնակի, 100 տոկոսից ավելի աճ։ Եվ եթե առկա օրինաչափությունը պահպանվի, ապա հոկտեմբերի 26-27-ին կունենանք 1400-1500 նոր դեպք։ «Եվ սա զարմանալի չէ, որովհետև իսկապես ռազմական դրությունից առաջ, սեպտեմբերի 10-15-ից սկսած, աստիճանաբար դեպքերը սկսեցին ավելանալ, որը մեծապես պայմանավորված էր անվտանգության դեպքերի չպահպանումով։ Հետագայում արդեն վիճակն ավելի խորացավ ռազմական դրության ժամանակ։ Բացի դրանից՝ իրավիճակով պայմանավորված, երբ հանրային տրանսպորտը քիչ է, և բնակչությունը միանգամից փորձում է տեղավորվել հանրային եղած քիչ թվով տրանսպորտային միջոցներում, իրար հետ քիթ քթի փոխադրվում են, դիմակների պահանջը ոչ ոք գրեթե չի պահպանում, ապա առկա վիճակագրությունը, վարակի տարածման տեմպը լրիվ հասկանալի է դառնում»,- ասաց Սահակյանը։
Մեր զրուցակցի խոսքերով՝ այս պահին էլ կորոնավիրուսով հիվանդներով հիվանդանոցները ծանրաբեռնված են, և սա այն պարագայում, որ հոսպիտալացվում են միայն ծանր, իրոք հոսպիտալացման կարիք ունեցող հիվանդները։
«Այս պահի դրությամբ արդեն ունենք 1600-ից ավելի հոսպիտալացված հիվանդներ, իսկ մոտ 7700-ից ավելի հիվանդներ ինքնամեկուսացված են տնային պայմաններում։ Իսկապես վիճակը ծանրանում է և պետք է հաշվի առնել, որ մենք գտնվում ենք պատերազմական վիճակում, ռազմական դրության պայմաններում, և մեր հոսպիտալային ֆոնդը, ռեսուրսները ավելի շատ կարիք կա ծառայեցնելու վիրավոր զինծառայողներին»,-ասաց Սահակյանը՝ հավելելով, որ եթե վարակի թվերը նման տեմպով աճեն, ապա արդեն մահճակալային ֆոնդը չի բավարարի։ Մահճակալային ֆոնդը չի բավականացնի արդեն կորոնավիրուսով ծանր հիվանդների համար։ «Սա, ինչ խոսք, բոլորի ինքնագիտակցության խնդիրն է։ Մենք բոլորս պետք է հասկանանք, որ այսօր թիկունքում գտնվելով՝ ունենք մեր ռազմաճակատը։ Մենք պետք է թիկունքը առողջ պահենք, որպեսզի առաջնագիծը առողջ լինի։ Վիրուսը սահման չի ճանաչում, նա հանգիստ կարող է թիկունքից տեղափոխվել առաջնագիծ։ Մենք ունենք վիրավորներ, վիրավորները ևս կարող են վարակվել։ Վիրավորի առողջական վիճակը կարող է վիրուսի պատճառով խաթարվել։ Այս ամենը պետք է գիտակցենք ու սկսենք պահպանել անվտանգության բոլոր կանոնները։ Ընդ որում՝ ավելի խիստ ձևով, քան նախկինում։ Բայց, ցավոք սրտի, մարդիկ մոռացության են մատնել վարակը։ Բոլորի մտածում են առաջնագծի մասին։ Ես չեմ ասում՝ չմտածել առաջնագծի մասին։ Այո՛, առաջնահերթ պետք է մտածել առաջնագծի մասին ու հենց առաջնագծի, պատերազմի, մեր զինվորների առողջության համար մենք բոլորս պետք է վերադառնանք դիմակներին, խստագույնս պահպանենք բոլոր անվտանգության կանոնները։ Հիմա առաջին ալիքի տարբերությամբ ոչ թե պարտադրանքը պետք է գործի, այլ մարդիկ այս ամենը գիտակցելով պետք է անեն այդ ամենը»,- ընդգծեց Գայանե Սահակյանը։
Մեր հարցին՝ ինչ կանխատեսում կա, այս դեպքո՞ւմ էլ առաջին ալիքի պես վարակի դեպքերը կհասնեն պիկին ու կսկսեն նվազել, թե՞ շատ ավելի վատ պատկեր կլինի՝ պատերազմական իրավիճակով պայմանավորված, Սահակյանը պատասխանեց. «Առաջին ալիքի ժամանակ շատ ծանր վիճակում էինք հունիսի սկզբին, բայց այդ ժամանակ մենք կարողացանք իրավիճակը վերահսկելի դարձնել դիմակների պարտադրանքի, տուգանքների շնորհիվ։ Ես այդ ժամանակ բաց, փակ տարածքում առանց դիմակի որևէ մեկին չեմ տեսել։ Դիմակ կրելը դարձել էր մշակույթ և դա մեզ օգնեց, որ կարողացանք այդ վիճակը հաղթահարել։ Եթե այդ ամենը հիմա էլ պահպանվի, մարդիկ գիտակցեն, որ առանց այն էլ պատերազմ է, մենք կկարողանանք այս երկրորդ ալիքն էլ հաղթահարել»։