на Русском
Լարված իրավիճակ Կիրանց, Բաղանիս և Ոսկեպար գյո... 
Հրդեհ՝ Երևանի Ֆանարջյան փողոցում
Իրանական «Արման Մելի» օրաթերթը լուսաբանել է Արցախի նախագահի հակաահաբեկչական կոալիցիա կազմելու կոչը
«Ղարաբաղը թուրքական հզորության համար փորձադաշտ» վերնագրով հոդվածում թերթը ներկայացրել է Արցախի նախագահ Արայիկ Հարությունյանի ելույթը, որով կոչ է արվում Իրանին և Ռուսաստանին հակաահաբեկչական կոալիցիա ստեղծել։ Թերթը ներկայացրել է նաև միջազգային հարցերի փորձագետ Ասադուլլահ Աթարիի հետ զրույցը:
Սիրիայից Արցախի տարածաշրջան մտած ահաբեկիչների մասին հարցին, և հարցին, թե անհրաժեշտ է արդյոք միջոցներ ձեռնարկել նրանց դեմ պայքարի համար, փորձագետը նշել է, որ ակնհայտ է, որ Թուրքիան ծայրահեղական գրոհայիններ և թուրքմենական գումարտակներ է տեղակայել տարածաշրջանում:
Աթարին նշել է, որ Իրանն ու Ռուսաստանն արդեն մտահոգություն են հայտնել այս կապակցությամբ: «Ակնհայտ է, որ Թուրքիան իրանական սահմանի երկայնքով գործողություններ է իրականացնում վարձկանների միջոցով, դա շատ վտանգավոր է Իրանի համար, և մենք պետք է ավելի լուրջ միջամտենք այս հարցում», – ասել է նա:
Հարցին, թե ինչու է Թուրքիան նման վտանգավոր գործողություններ ձեռնարկում, Աթարին ասել է, որ Թուրքիան ահաբեկչական խմբավորումներ է տեղակայել Իրանի «անվտանգության առաջին օղակում»՝ միայն Սիրիայում կրած պարտությունը փոխհատուցելու համար:
«Բոլորը պետք է իմանան, որ այլ տարբերակ չկա, քան պայքարել ահաբեկչության դեմ: Այսօր Իրանի ազգային միասնությունը սպառնալիքի տակ է: Թուրքիան այլևս հին Թուրքիան չէ», – ասել է նա:
Աթարին նշել է, որ Անկարան դարձել է տարածաշրջանում լարվածության աղբյուր, և հավելել է, որ Թուրքիայի անպատասխանատու պահվածքը կարող է ազդել Թեհրանի հետ հարաբերությունների վրա: Փորձագետը նշել է, որ Անկարան, հետապնդելով իր շահերը, մուտք է գործել էներգետիկ ռեսուրսներով հարուստ տարածաշրջան: Թուրքիան ազգայնական հուզումներ է հրահրում աշխարհի տարբեր մասերում, և դա վտանգավոր է նաև Իրանի համար՝ ասել է փորձագետը:
Ինչպե՞ս կարող է Իրանը դրական դեր խաղալ արցախյան ճգնաժամում, հետ մղել ահաբեկչական սպառնալիքը: Այս հարցին Աթարին պատասխանել է, որ Արցախյան հակամարտության կարգավորման լավագույն միջոցը 3 + 1 ձևաչափն է (Հայաստան, Ադրբեջան, Վրաստան, Իրան): Նա նշել է, որ ահաբեկչության դեմ պայքարը պետք է առաջնահերթություն լինի այս բոլոր երկրների համար: Փորձագետի կարծիքով՝ Ռուսաստանն ու Ադրբեջանը պետք է զգուշանան ահաբեկիչների կողմից լուրջ սպառնալիքներից:
