«Թուրքիայում փոքրամասնությունները երկրորդ կարգի քաղաքացիներ են համարվում». France 24-ը ներկայացրել է թուրքաբնակ հայերի մտահոգությունները ԼՂ հակամարտության սրմանը զուգահեռ (տեսանյութ)
Ֆրանսիական France 24 հեռուստաալիքը զրուցել է Թուրքիայում բնակվող և գործող հայերի հետ: «Լեռնային Ղարաբաղի հակամարտության սրմամբ՝ Թուրքիայի 70 000 անդամ ունեցող հայ համայնքը նույնպես շաբաթներ շարունակ կրկին ենթարկվում է սպառնալիքների և ահաբեկումների»,- հաղորդում են հեռուստաալիքի թղթակիցները:
Նրանք զրուցել են տեղի հայկական պատմական համայնքի ներկայացուցիչ, ատամնաբույժ Թաթյոս Բեբեքի հետ, որն ասել է. «Մենք վախենում ենք, քանի որ Թուրքիայում փոքրամասնությունները երկրորդ կարգի քաղաքացիներ են համարվում»:
Հեռուստաալիքն անդրադարձ է կատարել 1915 թվականի Հայոց ցեղասպանությանը, ինչպես նաև «Ակօս» երկլեզու թերթի հիմնադիր և խմբագիր Հրանտ Դինքի սպանությանը:
«Ակօս»-ի ներկայիս գլխավոր խմբագիր Երվանդ Տանձիկյանը նշել է, որ հայերը մշտապես թիրախավորված են Թուրքիայում:
«Նախագահ Էրդողանն ինքն է ատելության լեզվով խոսում՝ ուղղված հայերի դեմ»,- հեռուստաալիքին տված հարցազրույցում շեշտել է Թուրքիայի խորհրդարանի հայազգի պատգամավոր Կարո Փայլանը:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 13-ի դրությամբ Արցախի զինուժը խոցել է հակառակորդի՝ 16 ուղղաթիռ, 18 ինքնաթիռ, 173 անօդաչու թռչող սարք, 521 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 5139 զոհ։ Հայկական կողմից, նախնական տվյալներով, կա 532 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում սպանվել է 25 քաղաքացիական անձ, վիրավորվել է 102 քաղաքացիական անձ, վնասվել՝ մոտ 5800 գույք ու ենթակառուցվածք։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։
Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։