Փորձագետ. Կենտրոնական Ասիայի ՀԱՊԿ անդամ երկրները Թուրքիայի կամքը չեն կատարի

Դժվար թե Թուրքիան կամովին հեռանա Անդրկովկասի տարածաշրջանից: Այս մասին հայտարարեց Արցախի նախագահի խորհրդական Դավիթ Բաբայանը՝ NEWS.am-ի համար մեկնաբանելով թյուրքական զորքեր ստեղծելու Թուրքիայի նախաձեռնության մասին լրատվամիջոցներում հայտնված տեղեկատվությունը:

«Ես ավելի քան համոզված եմ, որ նման քայլ կկատարվի: Թուրքիան արդեն ներկա է այստեղ՝ ուզենք, թե չուզենք: Եվ դժվար թե ապագայում թուրքական ստորաբաժանումները լքեն Ադրբեջանը: Այսինքն, նրանք կլինեն Նախիջեւանում, Ադրբեջանի տարբեր շրջաններում, հնարավոր է՝ հագնեն ադրբեջանական ռազմական համազգեստ, կամ էլ ինչ-որ կերպ անվանեն այս զորամիավորումները: Այս մտադրությունները օրինականացնելու եւ ամեն ինչին իրավական երանգ տալու համար սկսվում է թյուրքական որոշ միավորված զինված ուժերի նախաձեռնություն: Եվ առաջին քայլը կլինի հենց Ադրբեջանի հետ միությունը: Սա շատ լուրջ մարտահրավեր է` լուրջ սպառնալիքներով: Բայց ցանկացած մարտահրավեր պարունակում է նաեւ հնարավորություններ: Այդ պատճառով ես համոզված եմ, որ մենք ընդհանուր շահեր կունենանք եղբայրական Ռուսաստանի, Իրանի, ԱՄՆ-ի, Չինաստանի եւ շատ այլ երկրների հետ:

Չեմ կարծում, որ ՀԱՊԿ անդամները կմասնակցեն Թուրքիայի այս արկածախնդրությանը այն բանից հետո, ինչ նա արեց Անդրկովկասում: ՀԱՊԿ գործընկերների, Չինաստանի եւ Իրանի արձագանքը Կենտրոնական Ասիայի երկրների գործողություններին`Թուրքիայի հետ գոնե որոշակի աշխարհաքաղաքական ինտեգրման համար, որակապես տարբեր կլինի: Նրանց համար ձեռնտու չէ գնալ այդպիսի առճակատման Ռուսաստանի, Իրանի, Չինաստանի հետ՝ հաշվի առնելով, որ նրանք գտնվում են այդ մեծ տերությունների միջեւ»,- ասաց Դավիթ Բաբայանը:

Միեւնույն ժամանակ, նա արձանագրեց, որ թուրքական ազդեցությունն արդեն հանգեցրել է նրան, որ Ադրբեջանը անկախ պետությունից վերածվել է առնվազն Թուրքիայից կախված երկրի, իսկ ավելի շուտ՝ ինքնավար վիլայեթի: