Վրաստանի վարչապետը հրավիրել է Հայաստանի եւ Ադրբեջանի ներկայացուցիչներին հանդիպել Թբիլիսիում

Վրաստանի վարչապետ Գիորգի Գախարիան Ադրբեջանի եւ Հայաստանի ներկայացուցիչներին առաջարկել է հանդիպում անցկացնել Թբիլիսիում` հակամարտող կողմերի միջեւ բանակցային գործընթաց հաստատելու նպատակով: Այս մասին ասվում է պաշտոնական հայտարարության մեջ, որում վարչապետը մեկնաբանել է Հայաստանի եւ Ադրբեջանի միջեւ ռազմական գործողությունների վերսկսումը, հաղորդում է «Նովոստի-Գրուզիա»-ն:

«Հայաստանի եւ Ադրբեջանի հերթական ռազմական առճակատման արդյունքում բարդ իրավիճակ է ստեղծվել, կան մեծ կորուստներ, եւ, ցավոք, ռազմական գործողությունների դադարեցումը եւ երկխոսության վերսկսումը դեռ հնարավոր չի թվում:

Բոլորս հասկանում ենք, որ իրավիճակի հետագա սրումը ծայրաստիճան բացասաբար կանդրադառնա ողջ տարածաշրջանի անվտանգության վրա:

Մենք մեկ անգամ եւս ԵԱՀԿ Մինսկի խմբի համանախագահներին եւ միջազգային մասնակիցներին կոչ ենք անում առավելագույնս օգտվել սրացումը դադարեցնելու եւ երկխոսությունը վերսկսելու իրենց հնարավորություններից:

Ինչպես գիտեք, մեր երկրին բարիդրացիական հարաբերություններ են կապում երկու երկրների` Ադրբեջանի եւ Հայաստանի հետ:

Պատմականորեն Վրաստանում ապրող ադրբեջանցիները եւ հայերը` մեր քաղաքացիները, միշտ կարեւոր դեր են խաղացել ոչ միայն մեր երկրի, այլեւ ամբողջ տարածաշրջանի զարգացման եւ ամրապնդման գործում: Միեւնույն ժամանակ, նրանց խաղաղ գոյակցությունը լավ օրինակ է այն բանի վրա, որ վրացիները, հայերը եւ ադրբեջանցիները կարող են ամբողջ Հարավային Կովկասը վերածել խաղաղության եւ զարգացման գոտու: Մեր ընդհանուր շահն է հնարավորինս շուտ խաղաղություն հաստատել տարածաշրջանին: Վրաստանը պատրաստ է ցանկացած կերպ նպաստել այս գործընթացին, այդ թվում` հակամարտության կողմերի ներկայացուցիչների հանդիպում անցկացնել Թբիլիսիում` երկխոսություն հաստատելու նպատակով»,- նշվում է Վրաստանի վարչապետի հայտարարության մեջ: