WSJ. Էմիրի մահից հետո Քուվեյթը ճնշման կբախվի` Իսրայելի հետ հարաբերությունների կարգավորման նպատակով

Տասնամյակներ շարունակ Քուվեյթը չեզոք դիրք է ունեցել Մերձավոր Արեւելքում առկա բազմաթիվ դժվար լուծելի հակամարտություններում: Սակայն դրա երկարամյա ղեկավարի` շեյխ Սաբահ ալ-Ահմադ ալ-Ջաբեր ալ-Սաբահի մահը երկընտրանք է առաջացնում նրա իրավահաջորդի համար` կարգավորել Իսրայելի հետ հարաբերություններն առանց պաղեստինցիների պետականության, թե՞ ոչ, գրում է WSJ:

Հանգուցյալ շեյխ Սաբահ ալ-Ահմադ ալ-Ջաբեր ալ-Սաբահը պաղեստինցիների համառ կողմնակիցն էր, նույնիսկ երբ արաբների աջակցությունն անկախ պետության տեսլականին թուլացավ: ԱՄՆ-ի միջնորդությամբ հարաբերությունների կարգավորումն Իսրայելի եւ Պարսից ծոցի արաբական երկու պետությունների` Արաբական Միացյալ Էմիրությունների եւ Բահրեյնի միջեւ ճնշում է գործադրել մյուսների, այդ թվում` Քուվեյթի վրա, որպեսի դրանք հետեւեն իրենց օրինակին:

Քուվեյթի թագավորական ընտանիքի բարձրաստիճան անդամն ակնկալում է, որ Սաուդյան Արաբիան եւ ԱՄԷ-ն կփորձեն ճնշել Քուվեյթին, որպեսզի այն ավելի շատ հետեւի իրենց օրինակին, հատկապես` տարածաշրջանային հարցերի շուրջ, որոնցում շեյխ Սաբահը ձգտում էր կենտրոնական դեր խաղալ: Ըստ նրա` Քուվեյթի նոր էմիր, շեյխ Նավաֆ ալ-Ահմադ ալ-Զաբեր ալ-Սաբահն ակտիվորեն մասնակցում էր իր նախորդի որոշումներին եւ չի աջակցում էր Իսրայելի հետ հարաբերությունների միակողմանի կարգավորմանը:

«Քուվեյթը ցանկանում է չեզոք դիրքորոշում ունենալ,- ասել է նա:- Մենք չենք սատարելու եւ փառաբանելու այն, ինչ տեղի է ունենում, բայց եւ չենք քննադատելու»:

Նոր էմիրը շուտով բանակցություններ կսկսի իշխող ընտանիքի մյուս առաջատար անդամների հետ ` բարձրաստիճան պաշտոնյաների, այդ թվում` նոր թագաժառանգի ընտրության վերաբերյալ` գործընթաց, որը կարող է շաբաթներ եւ գուցե ամիսներ տեւել:

Թագաժառանգի ընտրությունը կարեւոր է, քանի որ շեյխ Նավաֆն արդեն 83 տարեկան է եւ վատառողջ է: Լավագույն թեկնածուների թվում են Շեյխ Սաբահի ավագ որդին` 72-ամյա Շեյխ Նասեր ալ-Սաբահը, նրա 79-ամյա եղբորորդին` նախկին վարչապետ շեյխ Նասեր ալ-Մուհամեդը: