Ի՞նչ է կատարվում եվրոպական խաղադաշտերում

Անսովոր է հետեւել ֆուտբոլային հանդիպումներին, երբ մարզադաշտի տրիբունաները դատարկ են: Անսովոր է եւ տխուր, բայց այն, որ խաղերը կայանում են, արդեն իսկ լավ է եւ հույս է ներշնչում, որ շուտով երկրպագուները կվերադառնան խաղադաշտ:

Իսկ հիմա տեսնենք, թե ինչպիսին է իրավիճակը մի շարք երկրների առաջնություններում.

ԱՆԳԼԻԱ

Այստեղ ընթանում է երկրորդ տուրը: Այն կավարտվի այսօր կայանալիք Աստոն Վիլա-Շեֆիլդ եւ Վուլվերհեմփթոն-Մանչեսթեր Սիթի հանդիպումներով:

Հինգ թիմ՝ Լեսթերը, Էվերտոնը, Արսենալը, Լիվերպուլը եւ Քրիսթալ Փելեսը երկու խաղից հետո ունեն հարյուր տոկոսանոց ցուցանիշ:

Իսկ ահա Վեսթ Հեմը, Ֆուլհեմը, Սաութհեմփթոնը եւ Վեսթ Բրոմովիչ Ալբիոնը երկու խաղերում էլ պարտվել են:

Հետաքրքիր վիճակագրություն ունի նորեկ Լիդսը, որն առաջին խաղում 4:3 հաշվով պարտվեց Լիվերպուլից, իսկ հաջորդ տուրում նույն հաշվով հաղթեց Ֆուլհեմին:

ԻՍՊԱՆԻԱ

Այստեղ եւս ընթանում է երկրորդ տուրը, բայց մի քանի թիմ, այդ թվում Բարսելոնան եւ Մադրիդի Ատլետիկոն իրենց հանդիպումները կսկսեն երրորդ տուրից: Մադրիդի Ռեալն էլ բաց էր թողել առաջին տուրի հանդիպումը, իսկ երկրորդ տուրում 0:0 հաշվով ավարտեց արտագնա հանդիպումը Ռեալ Սոսիեդադի հետ:

Իսպանիայում, այնպես ինչպես Անգլիայում խաղերն ընթանում են դատարկ տրիբունաներով:

Գրանադան եւ Ռեալ Բետիսը վեցական միավորով գլխավորում են մրցաշարային աղյուսակը, իսկ երրորդ տուրը կսկսվի սեպտեմբերի 25-ին:

ԻՏԱԼԻԱ

Միլան-Բոլոնիա հանդիպումով կավարտվի առաջին տուրը, որին չմասնակցեցին միանգամից վեց թիմ: Իսկ առաջին տուրում Հենրիխ Մխիթարյանի Ռոման մրցակցի դաշտում 0:0 խաղաց Հելաս Վերոնայի հետ:

Չեմպիոն Յուվենտուսն էլ առաջնությունը սկսեց 3:0 հաշվով հաղթանակով: Իր գոլերի հաշիվը բացեց Ռոնալդուն, խփելով երրորդ գոլը Սամպդորիայի դարպասը:

ԳԵՐՄԱՆԻԱ

Ի տարբերություն Անգլիայի, Իսպանիայի եւ Իտալիայի, Գերմանիայում առաջին տուրին մասնակցեցին բոլոր 18 թիմերը: Տպավորեց Բավարիայի դաժան՝ 8:0 հաշվով հաղթանակը Շալկեի նկատմամբ:

Սարգիս Ադամյանի Հոֆենհայմը 3:2 հաշվով հաղթեց Քյոլնին: Դորտմունդի Բորուսիան 3:0 հաշվով հաղթեց Մյունխենգլադբախին, իսկ Լայպցիգը 3:1 հաշվով պարտության մատնեց Մայնցին:

Առաջնության նորեկ Արմինիան մրցակցի դաշտում 1:1 խաղաց Այնտրախտի հետ:

ՖՐԱՆՍԻԱ

Ավարտվեց չորրորդ տուրը: Ի տարբերություն վերոհիշյալ երկրների, այստեղ խաղերն ընթանում են ֆուտբոլասերների ներկայությամբ:

Չորս տուրից հետո աղյուսակը գլխավորում են Ռենն ու Սենտ Էտիենը, որոնք ունեն տասական միավոր: Իսկ ահա Պարի Սեն Ժերմենը վեց միավորով միայն ութերորդ տեղում է, քանի որ առաջին երկու խաղերում պարտվեց:

Միշել Տեր-Զաքարյանի գլխավորած Մոնպելիեն ինը միավորով երրորդ տեղում է: Այս տուրում հայ մասնագետի թիմը 4:1 հաշվով հաղթեց Անժերին:

Առաջնության հետնապահը Դիժոնն է, որը չի վաստակել անգամ մեկ միավոր:

ՌՈՒՍԱՍՏԱՆ

Դինամո Մոսկվա-Ախմատ խաղով, որը կկայանա այսօր, կավարտվի ութերորդ տուրը: Ֆրանսիայի նման, այստեղ եւս տրիբունաներում երկրպագուներ լինում են:

Իսկ ութ տուրից հետո 17-ական միավորով աղյուսակը գլխավորում են Զենիթն ու Սպարտակը, որն այս տուրում մրցակցի դաշտում 2:0 հաշվով հաղթեց Ռուբինին, իսկ Զենիթը Եկատերինբուրգում 1:1 խաղաց Ուրալի հետ:

Առաջնությունն անհաջող են սկսել երեք եւ երկու միավոր ունեցող Խիմկին եւ Ռոտորը: