Միացյալ Նահանգների միջազգային հեղինակությունն ընկել է կորոնավիրուսի համավարակի պայմաններում
Միացյալ Նահանգների միջազգային հեղինակությունն ընկել է կորոնավիրուսի համավարակի պայմաններում: Pew Research Center հետազոտական կենտրոնի համաձայն՝ 13 հարցված երկրներում դրական վերաբերմունքը ԱՄՆ-ի հանդեպ ընկել է ռեկորդային ցածր մակարդակի վրա:
Թեեւ ԱՄՆ-ի միջազգային վարկանիշը վատացել է 2017-ին նախագահ Դոնալդ Թրամփի կողմից իր պաշտոնը ստանձնելուց հետո, Pew-ն հայտնաբերել է, որ երկրի հեղինակությունը ավելի շատ տուժել է նրանից, ինչը ընկալվում է որպես համավարակին վատ կազմակերպված պատասխան: Pew-ն պարզել է, որ հարցվածների միայն 15%-ն է կարծում է, թե ԱՄՆ-ը լավ է հաղթահարել ճգնաժամը:
Չնայած վերջին մի քանի շաբաթներին ԱՄՆ-ում նոր դեպքերի թիվը նվազել է, երկրում գրանցվել է աշխարհում վիրուսներից մահացության ամենաբարձր պաշտոնական թիվը՝ շուրջ 195 000 մարդ:
Մեծ Բրիտանիայում հարցվածների միայն 41%-ն է դրական վերաբերվում ԱՄՆ-ին, ինչը գրանցված ամենացածր ցուցանիշն է: Ֆրանսիայում 31%-ը դրական է գնահատում ԱՄՆ-ին, ինչը համապատասխանում է ցածր մակարդակին, որը գրանցվել է 2003թ., երբ երկու երկրները վիճում էին ԱՄՆ-ի գլխավորությամբ Իրաքի պատերազմի կապակցությամբ: Գերմանացիները հատկապես բացասական են վերաբերվում ԱՄՆ-ին՝ միայն 26%-ը դրական վերաբերմունք ունի այդ երկրի հանդեպ, ինչը 25%-ով քիչ ավելի է 2003թ. մակարդակից, երբ Գերմանիան, ինչպես եւ Ֆրանսիան, դեմ էր Իրաքի պատերազմին:
Հարցված երկրներից միայն Հարավային Կորեայում է մարդկանց մեծամասնությունը՝ 59%-ը, դրական վերաբերվում Միացյալ Նահանգներին:
Pew-ն վերլուծել է նաեւ կարծիքները Թրամփի մասին, որին նոյեմբերին վերընտրվելու համար պայքար է սպասվում իր դեմոկրատ հակառակորդ, նախկին փոխնախագահ Ջո Բայդենի դեմ:
Նախագահի վարկանիշները բոլոր ուղղություններով ցածր են եղել հատկապես Բելգիայում, որտեղ հարցվածների միայն 9%-ն է դրական վերաբերվում Թրամփին: Ճապոնացիները ամենադրականն են տրամադրված, չնայած միայն 25%-ն է վստահություն հայտնել Թրամփին:
Թրամփի հանդեպ վերաբերմունքը միշտ շատ ավելի բացասական է եղել, քան նրա նախորդ Բարաք Օբամայի հանդեպ վերաբերմունքը, հատկապես՝ Արեւմտյան Եվրոպայում: Համաձայն ուսումնասիրության՝ Մեծ Բրիտանիայում, Իսպանիայում, Ֆրանսիայում եւ Գերմանիայում Թրամփի վարկանիշները նման են Ջորջ Բուշ-կրտսերի վարկանիշներին՝ նախագահության ավարտին, երբ նրա հեղինակությունը խարխլվել էր Իրաքում բռնությունների պատճառով: