Հավաքների կազմակերպման համար տուգանքը չափազանց մեծ է․ իրավապաշտպան
Իրավապաշտպան Ռուբեն Մելիքյանը կարծում է՝ չափազանց բարձր տուգանք է սահմանված կարանտինի ընթացքում հավաքներ կազմակերպելու համար։
«Կազմակերպման համար տուգանքը չափազանց մեծ է։ Այն պետք է գոնե մոտ լիներ մասնակցի տուգանքին։ Իհարկե, իրավաբանական տեսանկյունից հասկանալի է, որ եթե ինչ որ բան արգելված է, կմնա թղթի վրա, եթե չսահմանվի պատասխանատվություն։ Բայց չեմ կարծում ՝ այդքան մեծ պետք է լիներ այդ տուգանքը, հատկապես որ կարող են հավաքի մասակիցները լինել երկուսը եւ մեկը լինի կազմակերպիչը»,- NEWS.am-ի հետ զրույցում ասել է նա։
Ռուբեն Մելիքյանի խոսքով՝ ճիշտ չէր նաեւ կարանտինն այդքան երկար ժամանակով սահմանելը։
«Կարող էին առավելագույնը երկու ամսով սահմանել, հատկապես որ ունենք դրական դինամիկա համաճարակային տեսանկյունից, ոչ թե այդքան ժամանակով՝ ընդգրկելով նաեւ նոր տարվա շրջանը։ Հաշվի պետք էր առնել նաեւ, որ եթե համաճարակային վիճակը վատանար, իրենք այն ժամանակ կարող էին երկարացնել»,- ասել է նա։
Նշենք, որ Հայաստանում սեպտեմբերի 11-ից հայտարարված կարանտինի ընթացքում քաղաքացիների համար սահմանված կանոնների պահպանմանը կհետեւի ոստիկանությունը։ Դիմակ չկրելու համար մարդիկ ինչպես արտակարգ դրության ժամանակ, հիմա նույնպես կտուգանվեն 10 հազարական դրամով։
Քաղաքացիները 10 հազարական դրամով կտուգանվեն նաեւ ազատ տեղաշարժի կամ տրանսպորտային միջոցների տեղաշարժման սահմանափակումները խախտելու դեպքում։ Ավելի բարձր՝ 50․000 – 200․000 դրամ տուգանք է սահմանվում մեկուսացման կամ ինքնամեկուսացման կանոնները խախտելու համար։
Կանոնավոր փոխադրումներ իրականացնող տրանսպորտային միջոցների սահմանափակումները խախտելը կառաջացնի 50.000 - 100.000 դրամի տուգանք։
Կարանտինի ընթացքում նույնպես հավաքների կազմակերպման սահմանափակումներ են գործում՝ դրանք պետք է անցկացվեն անհատական պաշտպանության միջոցների կիրառմամբ եւ մասնակիցների միջև նվազագույնը 1,5 մետր հեռավորության պահպանմամբ: Այս կանոններին չհետեւելու պարագայում հավաքներ կազմակերպողները կտուգանվեն 50-ից 200, իսկ մասնակիցները՝ 10 հազար դրամով։
Կարանտինը հայտարարված է մինչեւ հունվարի 11-ը։