ԱՄՆ-ն խոստացել է ԱՄԷ-ին չաջակցել Իսրայելի բնակավայրերի բռնակցմանը մինչեւ 2024 թվականը. ԶԼՄ-ներ
Արաբական Միացյալ Էմիրությունների (ԱՄԷ) եւ Իսրայելի միջեւ հարաբերությունների կարգավորման շուրջ բանակցությունների ընթացքում Վաշինգտոնն Աբու Դաբիին խոստացել է չսատարել Իսրայելի ինքնիշխանության տարածմանը Հորդանան գետի Արեւմտյան ափի որոշ մասերի վրա մինչեւ 2024 թվականը, հայտնում է ՏԱՍՍ-ը` վկայակոչելով Times of Israel-ը:
Ըստ պարբերականի` ԱՄԷ-ի իշխանությունները «Վաշինգտոնից պարտավորություն են ստացել զերծ մնալ Իսրայելի բռնակցումը սատարելուց` առնվազն մինչեւ 2024 թվականի հունվարը»: Պարբերականը նշում է, որ ԱՄՆ նախագահ Դոնալդ Թրամփի խաղաղության ծրագիրը, որը ներկայացվել էր 2020 թվականի հունվարին, «պաղեստինյան կողմին չորս տարվա պատուհան է տրամադրում` կարգավորման գործընթացին միանալու համար»: Հենց այս ժամանակահատվածն էր հիմք ընդունվում, երբ Աբու Դաբին ամերիկյան վարչակազմից հավաստիացումներ ստացավ Հորդանան գետի արեւմտյան ափի հատվածների բռնակցման իսրայելական ծրագրերի վերաբերյալ, գրում է The Times of Israel-ը:
Օգոստոսի 13-ին Թրամփը հայտարարել էր, որ Իսրայելն ու ԱՄԷ-ն համաձայնության են եկել երկկողմ հարաբերություններն ամբողջությամբ կարգավորելու շուրջ: Ըստ համաձայնագրերի` Իսրայելը կդադարեցնի իր ինքնիշխանության տարածումը Հորդանան գետի Արեւմտյան ափի հրեական բնակավայրերի վրա, ինչը նախատեսված է պաղեստինա-իսրայելական հակամարտության կարգավորման ամերիկյան ծրագրով: Այդ օրը` ավելի ուշ, Սպիտակ տան ղեկավարը մամուլի ասուլիսին ասաց, որ Իսրայելի ինքնիշխանության տարածումը Հորդանան գետի Արեւմտյան ափին «չի քննարկվել, հանվել է օրակարգից», եւ որ «Իսրայելը պայմանավորվել է չանել դա», ինչը «մեծ զիջում» է իսրայելական պետության կողմից:
Իսրայելի վարչապետ Բենյամին Նեթանյահուն անցյալ ամառ բազմիցս հայտարարել էր, որ չի ընդլայնի հրեական պետության ինքնիշխանությունն Արեւմտյան ափի որոշ մասերում` առանց ամերիկյան աջակցության նախապես ապահովման: Այդ պատճառով ԱՄԷ-ն «կենտրոնացած էր այս հարցով ԱՄՆ-ից, այլ ոչ թե Իսրայելից երաշխիքներ ստանալու վրա», նշում է The Times of Israel-ը: