Ականատեսն ենք հերթական ստին, Կառավարությունը վախենում է բնակիչների սուր արձագանքից․ Գորգիսյանը՝ Ամուլսարի մասին
«Լիդիան Արմենիան» մեկ նպատակ ունի՝ վարկաբեկել այն տղաներին ու աղջիկներին, որոնք երկու տարուց ավել պաշտպանում են իրենց բնակավայրը, չեն թողնում, որ Ամուլսարը շահագործվի։ Այս մասին NEWS.am-ի հետ զրույցում ասել է «Լուսավոր Հայաստան» խմբակցության քարտուղար Գեւորգ Գորգիսյանն՝ անդրադառնալով վերջին օրերին Ամուլսարում տեղի ունեցող գործողություններին։
«Քանի որ մենք բազմիցս ենք պաշտպանող հայտարարություններով հանդես եկել այդ խմբի նկատմամբ, եւ դեմ արտահայտվել Ամուլսարի հանքի շահագործմանը, կարծես՝ որոշել են մեզ էլ վարկաբեկել։ Մենք տիկին Սամսոնյանի հետ այցելել էինք Ամուլսարի պաշտպաններին, հարցրել նրանց որպիսությունը եւ հետո գնացել ենք։ Տղաների պնդմամբ՝ հենց այդ նույն գիշերը «Լիդիան Արմենիայի» պահնորդական կազմակերպության անդամները հարձակվել են դիրքերից մեկի վրա, որտեղ տղաներն են եղել, ծեծել են, տարել են «Լիդիան Արմենիայի» տարածք, որտեղ կրկին ծեծել են եւ երբ տղաները դուրս են եկել՝ ջղայնացած վիճակում քարեր են շպրտել նրանց ուղղությամբ, որի տեսագրությունը «Լիդիան Արմենիան» հրապարակել է, առանց նախնական տեսանյութի, որտեղ երեւում է, որ իրենք դուրս են գալիս, ծեծում եւ տանում են։ Այսինքն՝ եթե տեսաձայանգրությունը «պատահաբար» չի կորել, ապա այդ ամենը դրա վրա կա։ Եթե տեսագրությունը նայենք, երեւում է, որ այն տղան, որը քար է շպրտում «Լիդիան Արմենիայի» ուղղությամբ ճղճղված շորերով է, արդեն պարզ է, որ նրան ծեծել են»,- ասաց պարոն Գորգիսյանը՝ հավելելով, որ ոստիկանության աշխատակիցները նույնպես ծեծի են ենթարկվել կազմակերպության պահնորդական ծառայության կողմից։
Նշենք, որ սեպտեմբերի 7-ին, «Լիդիան Արմենիան» հայտարարությամբ էր հանդես եկել, որում բաց տեքստով ասում էր, որ «Լուսավոր Հայաստան» խմբակցության պատգամավորների հետ հանդիպումից հետո է «ոչ սթափ վիճակում գտնվող ապօրինություն իրականացնող խմբավորումը ներխուժել է Ամուլսարի տարածք, քարեր շպրտել, հայհոյանքներ ու սպառնալիքներ տեղացել տարածքում գտնվող համայնքի բնակիչների, «Լիդիանի» աշխատակիցների հասցեին»։
«Կարծում եմ՝ դեպքի առիթով իրավապահ մարմիններն արդեն իսկ զբաղվում են, պիտի ամբողջությամբ բացահայտվի, տեսանյութը տրամադրվի ոստիկանությանը։ Սրա արդյունքում այս պահնորդական կազմակերպությունը պետք է զրկվի իր լիցենզիայից, ինչպես նախորդի դեպքում տեղի ունեցավ»,- նշել է Գեւորգ Գորգիսյանը։
«Լուսավոր Հայաստան» խմբակցության քարտուղարի դիտարկամբ՝ եթե Ամուլսարի հանքը շահագործվի, ապա շրջակա միջավայրի վրա ազդեցությունը բացասական է լինելու։
«Մենք այս ամենն ուզում ենք վտագել, 10 տարի ինչ-որ ընկերության միլիարդների եկամուտ ապահովենք, չնչին հարկեր մուծվի ՀՀ-ին, հետո պոչամբարը, թունիքիմիկատները, ցիանդիը մնան Հայաստանում, իսկ իրենք էլ իրենց ոսկիները, փողերը վերցնեն ու գնան։ Վերացնենք այն ամբողջ հեռանկարը, որ Վայոց ձոր մարզն ունի, եւ՛ տուրիստական, եւ՛ այգեգործության ոլորտներում․ սա անթույլատրելի է, սա քայլ է Հայաստանի դեմ, ընդ որում՝ չեն փարատվել այն կասկածները, որը «Լիդիան Արմենիայի» աշխատանքի արդյունքում կարող են աղտոտվել այն ջրամբարներն ու ջրերը, որոնք Սեւան են լցվում։ Սա այն կարեւորագույն հարցերից է, որ Կառավարությունը պիտի իր խոստումը պահեր, բայց, ցավոք, ականտես ենք լինում հերթական ստին եւ վերջին շրջանի լռությունը ես նրանով եմ պայմանավորում, որ նրանք վախենում են բնակիչների սուր արձագանքից, բայց իրենց մտադրությունը շարունակում է մնալ այն, որ հանքը պիտի շահագործվի»,- նկատել է ընդդիմադիր խմբակցության քարտուղարը։
Գեւորգ Գորգիսյանի խոսքով՝ հանքը շահագործվելու պարագայում մեծ վնասներ են կրելու տեղի բնակիչները, եւ նրանց շնորհիվ է, որ մինչեւ հիմա հանքը չի շահագործվել։
«Նրանք մտածում են իրենց, իրենց ընտանիքի, երեխաների մասին։ Միանշանակ, այն մարդիկ, որոնք հիմա մի քանի հազար հոգով աշխատում են այդ տարածաշրջանում, զրկվելու են իրենց աշխատանքից, եւ «Լիդիան Արմենիայի» մի քանի հարյուր աշխատողներ են եկամուտ ստանալու։ Որ ասում են՝ այ, աշխատատեղեր, սա միֆ է, որովհետեւ հենց հիմա ավելի շատ աշխատատեղ է ապահովում Ջերմուկ քաղաքը՝ որպես առողջարանային կենտրոն, քան ապահովելու է «Լիդիան Արմենիան», եթե Ջերմուկ առողջարանային քաղաքը մի քանի հարյուր տարի կարող է աշխատել, իսկ հանքը 10 տարով է բացվելու եւ ապականելու է այդ տարածքը։ Սա ոչ մի կերպ ընդունելի չէ եւ ձեռնտու չէ ՀՀ-ին։ Զարմանում եմ, որ մեր Կառավարությունը հապաղում է ինչ-որ լուրջ քայլեր ձեռնարկելուց։ Չգիտեմ՝ ինչո՞վ են իրենք կաշկանդված, բայց նրանք առնվազն կարող են այս մասին խոսել, հակառակ դեպքում տպավորություն է ստեղծվում, որ նրանք նախկինների պես ինչ-որ պայմանավորվածություններ ունեն»,- ասել է պատգամավորը։
Մեր դիտարկմանը, թե կաշկանդվածությունը կարո՞ղ է պայմանավորված լինել այն հանգամանքով, որ եթե հանքը չշահագործվի, Հայաստանը հնարավոր է հայտնվի արբիտրաժային դատարանում, Գեւորգ Գորգիսյանը դա հնարավոր համարում է, բայց դատարանում հայտվելու մասին՝ իր լսած կարծիքներն այն մասին, որ «Լիդիան Արմենիան» չի կարող դիմել արբիտրաժային դատարան՝ ինչ-ինչ պատճառներից ելնելով։
«Եթե բանը դրան հասնի, ապա ավելի լավ է ինչ-որ տույժ, տուգանքներ վճարենք, բայց երկիրը չվնասենք, որովհետեւ այդ ծավալների վնասը․․․․վատագույն դեպքում, եթե Սեւանը վնասվի Հայաստանի կեսը թունավորելու են»,-նշել է Գեւորգ Գորգիսյանը։
Ինչ վերաբերում է Շրջակա միջավայրի նորանշանակ նախարար Ռոմանոս Պետրոսյանի հետ հույսեր կապելուն, Գեւորգ Գորգիսյանն ասում է՝ նախարարի փոփոխությունից նոր բան սպասել պետք չէ, որովհետեւ Կառավարությունում որոշումը միանձնյա՝ վարչապետն է կայացնում։
«Մեծ փոփոխություններ այդ կարգի հարցերի շուրջ չեմ կարծում, որ նրա կալիբրի որոշելիքներն են, որովհետեւ հարցը շատ ավելի քաղաքական ու լուրջ է»,- եզրափակել է նա։