Հայաստանում տեխզննման տվյալները շուտով կլինեն էլեկտրոնային տեսքով
Այս օրենսդրական նախաձեռնության շնորհիվ Հայաստանում վարորդներն այլեւս տեխզննման կտրոնների կարիք չեն ունենա: Այս մասին ՀՀ Ազգային ժողովում Պաշտպանության եւ անվտանգության հարցերի մշտական խորհրդարանական հանձնաժողովի նիստին «Ճանապարհային անվտանգության ապահովման մասին» օրենքում փոփոխություններ կատարելու մասին օրինագծերի եւ հարակից օրենքների քննարկման ժամանակ ասաց ՀՀ տարածքային կառավարման եւ ենթակառուցվածքների փոխնախարար Արմեն Սիմոնյանը:
Ըստ նրա` զննումը կգրանցվի էլեկտրոնային եղանակով, ամեն ինչ կպահվի Ոստիկանության տվյալների բազայում: «Սա թույլ կտա ստուգել ավտոմեքենաները` առանց դրանք կանգնեցնելու»,- պարզաբանեց Սիմոնյանը:
Բացի այդ, կփոխվեն նաեւ տեխզննման կանոնները: Այդպես, առաջին անգամ ավտոմեքենան զննման պետք է տրվի արտադրության չորրորդ տարում, այնուհետեւ մինչեւ 10 տարի` երկու տարին մեկ, իսկ 10 տարի անց` տարին մեկ անգամ: Հասարակական ուղեւորափոխադրումների տրանսպորտային միջոցները պետք է ստուգվեն տարին մեկ անգամ մինչեւ 10 տարի եւ տարին երկու անգամ` 10 տարի անց:
Տեխնիկական զննման սակագները հաշվարկվելու են Հանրային ծառայությունները կարգավորող հանձնաժողովի կողմից եւ կառաջարկվեն տարածքային կառավարման եւ ենթակառուցվածքների նախարարության քննարկմանը: «Ընդհանուր առմամբ, հանրապետությունում 39 կետում կա 50 տեխզննման ստենդ, որոնք գտնվում են Երեւանում եւ գրեթե բոլոր մարզերում»,- ասաց փոխնախարարը:
Բացի այդ, տրանսպորտային միջոցի զննման առցանց վերահսկողություն է նախատեսվում, որպեսզի դա չմնա ձեւականություն, ինչպիսին եղել է մինչ այժմ: «Ոստիկանությունը կտեսնի, թե ինչպես է ավտոմեքենան ստուգվում տվյալ կետում եւ ինչն են ստուգում` արգելակները եւ այլն: Այլ կետերի աշխատակիցները դա նույնպես կտեսնեն: Եթե մի տեղում ավտոմեքենան ստուգում չի անցել եւ եկել է մեկ այլ կետ, ապա այնտեղ այն ավելի ուշադիր կստուգվի»,- ընդգծեց Սիմոնյանը:
Այս առաջարկը հատկապես դուր եկավ խորհրդարանական հանձնաժողովի նախագահ, իշխող «Իմ քայլը» դաշինքի պատգամավոր Անդրանիկ Քոչարյանին: «Շատ լավ է: Այսինքն «մերոնքական տղաները», ովքեր ժամանակին մենաշնորհել էին տեխզննումը եւ վարորդներից գումար էին հավաքում, այժմ նույնպես ստիպված կլինեն աշխատել նոր կանոնների համաձայն»,- շեշտեց Քոչարյանը:
Բացի այդ, խիստ տույժեր են սահմանվում տրանսպորտային միջոցի զննման ժամանակ ցուցաբերված անփութության համար: Մասնավորապես, եթե հայտնաբերվել է, որ ավտոմեքենան լուրջ խախտումների առկայության դեպքում լավ վիճակում է ճանաչվել, ապա ստուգման կետը կտուգանվի 1 միլիոն դրամով: Եթե մեկ տարվա ընթացքում խախտումը կատարվել է երկրորդ անգամ, ապա այն կզրկվի լիցենզիայից 6 ամիս ժամկետով, իսկ եթե երեք անգամ, ապա կետը պարզապես կզրկվի լիցենզիայից:
Սակայն մեկ այլ հարց դեռ լուծված չէ, որը բարձրացվեց «Լուսավոր Հայաստան» կուսակցության խորհրդարանական խմբակցության քարտուղար Գեւորգ Գորգիսյանի կողմից: «Եթե այդպիսի ավտոմեքենան վթարի է ենթարկվում, ապա ապահովագրական ընկերությունը կարող է չվճարել տուժած վարորդին ԱՊՊԱ-ն: Ընդ որում, խոսքը ոչ միայն ակնհայտ խախտումների մասին, օրինակ` արգելակները չեն աշխատում, այլ նաեւ` նրանց մասին, որոնք անփորձ կամ միջին վարորդը չի կարող նկատել: Այդ ժամանակ հարց է առաջանում` ինչու՞մ է վարորդի մեղքը, եթե նա տեխնիկական զննում է անցել` վստահելով մասնագետներին»,- հարցրեց Գորգիսյանը:
Նախարարությունն ու խորհրդարանականները պայմանավորվեցին քննարկել հարցն այն մասին, թե որքան ժամանակ է տրվելու վարորդին անսարքությունները վերացնելու համար, որի ընթացքում նա չի տուգանվի: Այնուամենայնիվ, այդ ժամանակահատվածը պետք է խստորեն սահմանափակվի: Նշենք, որ տեխնիկական սպասարկում չանցնելու համար տույժը 20 հազար դրամ կկազմի: Հանձնաժողովում նաեւ նշեցին, որ հանրապետությունում գործող տեխնիկական փորձաքննությունների անցկացման դատաբժշկական կենտրոններն այնքան ծանրաբեռնված են, որ մինչ վթարը տեղի ունենալն ավտոմեքենայի տեխնիկական վիճակի մասին պատասխան ստանալ հնարավոր է միայն 6 ամիս անց:
Այնուամենայնիվ, բավականին երկար քննարկումներից հետո խորհրդարանական հանձնաժողովը դրական եզրակացություն տվեց այս օրենսդրական նախաձեռնությանը: