Ֆակուլտետներ, որտեղ վարձավճարը բարձրացել է 100 000 և ավելի դրամով, իրավագիտության ֆակուլտետ՝ 1 ՄԼՆ դրամ. Մայր բուհում սովորելն աստիճանաբար թանկարժեք հաճույքի է վերածվում (Տեսանյութ)

Մայր բուհում սովորելն աստիճանաբար թանկարժեք հաճույքի է վերածվում. թանկարժեքը՝ բառի ուղիղ իմաստով: Համավարակի պայմաններում ուսանողներին տհաճ անակնկալ էր սպասվում: Մի քանի ֆակուլտետներում վարձավճարները զգալի բարձրացել են: Հարվածն, ինչպես միշտ, կրում են առաջին կուրսի ուսանողները, հաղորդում է Tert.am լրատվականը:

«Ուսման վարձը էնպիսի բան է, որ չի կարելի ամեն օր փոխել, ինչ վարձով ընդունվեց, դրանով էլ պետք է ավարտի, այսինքն՝ սա վերաբերվում է առաջին կուրսի ուսանողներին».-ասել է Երևանի պետական համալսարանի ռեկտորի ժամանակավոր պաշտոնակատար Գեղամ Գևորգյանը:

Օրինակ՝ Տեղեկատվական անվտանգության, Ինֆորմատիկա և կիրառական մաթեմատիկայի ֆակուլտետների ուսման վարձերն ավելացել են 160 000 դրամով։ Հիմա երկու ֆակուլտետների ուսման վարձը 700 000 դրամ է` նախկին 540 000-ի փոխարեն։
Կան ֆակուլտետներ, որտեղ վարձավճարը բարձրացել է 100 000 և ավելի դրամով: Միջազգային հարաբերությունների, Հանրային կառավարման, Կառավարման, Ֆինանսների և Իրավագիտության ֆակուլտետներում ուսման վարձը թանկացել է 130 000 դրամով։ Այս բոլոր ֆակուլտետների վարձավճարը դարձել է 780 հազար դրամ, Իրավագիտության ֆակուլտետինը՝ 1 միլիոն դրամ:

Թանկացումներից անմասն չեն մնացել նաև Լրագրության, Հայոց լեզվի և գրականության ֆակուլտետները՝ յուրաքանչյուրի վարձավճարը թանկացել է 70 000 դրամով:

Ավելացել են նաև մագիստրատուրայի վարձավճարները: Սա ուսանողներին մեծ անհարմարություններ է պատճառում: Եթե վարձավճարների բարձրացմամբ համալսարանը բալանսավորում է կրած վնասներն ու բարձրացնում դասախոսների աշխատավարձը, ուսանողներին այն կանգնեցնում է ֆինանսական խնդիրների առջև:

Համավարակային ճգնաժամի պայմաններում ուսման վարձը բարձրացնելը բարոյական չհամարողներին Գեղամ Գևորգյանը հակադարձում է՝ համալսարանը համավարակի ընթացքում մեծ կորուստներ է կրել:

«Բարոյական խրատներ չտաք, եկեք խոսենք օրենքներից, եկեք դուք նշեք, թե ինչն է էժանացել այս ընթացքում, ես հիմա կթվարկեմ համալսարանի կորուստները: 180 միլիոն դրամ չստացած գումարներ, որոնք, օրինակ, ուսման վարձերի պարտքեր են, մոտ 40 միլիոն դրամ զեղչ են արել այս կիսամյակում, Ծաղկաձորի բազան չի աշխատել»,-նշում է Գեղամ Գևորգյանը:

Կրթության ոլորտի փորձագետ Սերոբ Խաչատրյանի խոսքով՝ սա համակարգային խնդիր է:

«Ընդհանուր բուհերի վիճակը վատ է՝ կապված պետական ցածր ֆինանսավորման հետ, սա է խնդիրը: Ցավոք սրտի, բարձրագույն կրթությունը մեր տնտեսության արտացոլանքն է, մինչև կրթությունը չլավանա, բարձրագույն կրթությունը չի կարող լավ վիճակում լինել: Եվ եթե ուսանողները համարեն, որ այն, ինչ իրենք ստանում են, չի համապատասխանում վարձերին, ես կողմ կլինեմ, եթե նրանք այդ հարցը բարձրացնեն».-նշում է Սերոբ Խաչատրյանը և հավելում, որ դեռևս վաղ է ենթադրել՝ կրթության որակը կբարձրանա, թե ոչ:

Մանրամասները՝ Tert.am-ի տեսանյութում: