Հարավային Կորեայի խորհրդարանը փակել են լուսանկարչի մոտ կորոնավիրուս հայտնաբերելու պատճառով
Հարավային Կորեայի Ազգային ասամբլեան օգոստոսի 27-ից աշխատանքը ժամանակավորապես կդադարեցնի այն պատճառով, որ խորհրդարանի մամուլի ծառայության լուսանկարիչներից մեկը վարակվել է կորոնավիրուսով, հայտնում է «Ռյոնհափ» գործակալությունը։
Այս որոշումն ընդունվել է իրավիճակի շտապ քննարկումից հետո, հստակեցրել է գործակալության աղբյուրը։
Հինգշաբթի նախատեսված խորհրդարանական 9 կոմիտեների նիստերը հետաձգվել են։ Հայտնի է, որ հինգշաբթի առավոտյան այդ լուսանկարիչը հասցրել է մասնակցել մի միջոցառման, այնուհետեւ ստացվել են նրա թեստի արդյունքները։
Հաստատվել է, որ վարակակրի հետ շփվել է ավելի քան 50 մարդ, այդ թվում իշխող կուսակցության 14 բարձրաստիճան ներկայացուցիչ։ Նրանք բոլորը, հավանաբար, ստիպված կլինեն անալիզներ հանձնել եւ ինքնամեկուսանալ։
Անցած չորեքշաբթի հայտնի էր դարձել, որ կառավարական մի քանի գերատեսչությունները աշխատանքը դադարեցրել են, քանի որ այնտեղ նույնպես կորոնավիրուսային ինֆեկցիայի դեպքեր էին հայտնաբերվել։ Սեուլում կենտրոնական կառավարական համալիրի պահնորդի վարակման պատճառով շենքի մի ամբողջ հարկ փակել էին ախտահանում կատարելու համար։
Օգոստոսին ավելի վաղ հաղորդվել էր, որ Հարավային Կորեայի իշխանությունները քննարկում են անվտանգության միջոցառումները մինչեւ առավելագույն ուժեղացնելու հարցը, որոնք կոչված են COVID-19 կորոնավիրուսի երկրորդ ալիքի տարածումը զսպելուն։ Սեուլում, Ինչհոնում եւ Քենգիում ամսվա սկզբին իշխանությունները կրկին դադարեցրել էին մի շարք հանրային վայրերի աշխատանքը, ներառյալ գիշերային ակումբները եւ թանգարանները։ Արգելված են փակ տարածքում 50-ից ավելի եւ փողոցում 100-ից ավելի մարդու հավաքները։
Համավարակի սկզբից Հարավային Կորեայում հայտնաբերվել է 18 706 վարակակիր, այդ թվում՝ 441-ը վերջին օրում։ Մահացել է 313 հիվանդացած։