Դեռ պարզ չէ` կորոնավիրուսն է ավելի մեծ վտանգ իրենից ներկայացնում, թե դիմակ կրելը երեխաների համար. համաճարակաբան
Ուսումնական այս դասընթացը կազմակերպելիս միայն դիմակը չէ, որ խնդիր է, բայց բոլորը ֆիքսվում են դիմակի վրա: Այս մասին NEWS.am-ի հետ զրույցում ասել է բժիշկ-համաճարակաբան Էդուարդ Հովհաննիսյանը` անդրադառնալով դպրոցներում երեխաների դիմակ դնելու աղմկահարույց որոշմանը:
«Իրականում, տեխնիկապես շատ դժվար է լինելու իրականացնել այդ բոլոր գործընթացները եւ տպավորություն է, որ ինչ-որ արհեստական փաստաթուղթ է ստեղծվել, որ հետո որպես դոկումենտ գան, ստուգեն, դրա համար էլ բողոք է առաջանում»,- ասաց նա:
Համաճարակաբանի խոսքով` դեռ ուսումնասիրված չէ երեխաների շրջանում կորոնավիրուսով վարակվելու առանձնահատկությունները եւ պետք էր պարզել, արդյոք երեխաները հեշտ են վարակվում եւ հեշտ են վարակում ընտանիքի անդամներին:
«Դիմակի հետ կապված խնդիր էլ կա նաեւ այն առումով, թե մենք ինչ ենք ուզում, կանխարգելե՞լ ինչ-որ բան, դրա համար պետք է դիմակը ճիշտ կրել:Նախ վաճառվող դիմակները բոլորը մեկ չափսի են, եւ տեսել ենք` ինչպես են դրանք երեխաներին լինում, եւ արդյոք այդ դիմակը օգուտ կտա, եւ այդ դեպքում դիմակը դառնում է անիմաստ, արդյոք մենք ունենք այդքան դիմակների պաշար Հայաստանում: Կամ եթե տրանսպորտում երեխաները կրելու են դիմակ, հետո դասարանում կրելու են դիմակ, դա անխուսափելիորեն բերելու է հետեւանքների, ինչքան էլ ասեն, բայց կան հետազոտություններ, որ դիմակի երկար կրումը առաջացնում է թթվածնային քաղց: Բացարձակ ուսումասիրված չէ, թե ինչպիսի ազդեցություն է թողնում երեխաների առողջության, ուղեղի աշխատանքի, կենտրոնացվածության վրա երկար ժամանակով դիմակ կրելը եւ արդյոք կորոնավիրուսն է ավելի մեծ վտանգ, քան թե այս ամեն ինչը: Եւ հարց է, արդյոք երեխաները կարող են իդեալական կրել դիմակները եւ պետք էր բոլոր առավելությունները, թերությունները քննարկել, նոր նման որոշումներ կայացնել»,-ասաց նա:
Էդուարդ Հովհանիսյանի մոտ նաեւ տարակուսանք է առաջացնում դպրոցների բացման ժամկետը: Նա գտնում է, որ պետք է սեպտեմբերի 1-ից բացել դպրոցները եւ մինչեւ սուր շնչառական վիրուսների սկսվելը հասկանալ, թե ինչ իրավիճակ է տիրելու դպրոցում:
«Ես տրամաբանություն չեմ տեսնում, թե ինչի են դպրոցները բացում ամսի 14-ից, ավելի ճիշտ կլիներ ամսի 1-ից բացեին, որովհետեւ եթե ինչ-որ մի համաճարակաբանական պրոցես խթանվի, 1-2 ամիս կար, մինչեւ սուր շնչառական հիվանդությունների սկսվելը եւ կկարգավորվեր բավական մինչեւ այդ հոկտեմբեր-նոյեմբեր շրջանը: Ավելի շատ պետք է ուշադրություն դարձնել ուսուցիչների վրա, որպեսզի նրանք չվարակվեն եւ իրենք պետք է պաշտպանվեն»,- հավելեց նա: