«Բասար» մականունով հայտնի Արմեն Մելքոնյանը եւս 2 ամիս կմնա կալանքի տակ. նրան արգելված է տեսակցել
Քրեական ենթամշակույթ կրող խմբավորում ստեղծելու եւ ղեկավարելու մեջ մեղադրվող քրեական հեղինակություն հանդիսացող «Բասար» մականունով հայտնի Արմեն Մելքոնյանը կշարունակի մնալ կալանքի տակ. դատարանը երկարացրել է նրա կալանավորման որոշումը։ Այս մասին NEWS.am-ի հետ զրույցում ասել է Արմեն Մելքոնյանի պաշտպան Լիպարիտ Սիմոնյանը։
Նշենք, որ նրա փաստաբանը որոշումը բողոքարկել էր Վերաքննիչ քրեական դատարանը, որ մերժվել է։
«Շուտով կլրանա 6 ամիսը, որ Մելքոնյանը կալանքի տակ է։ Կալանավորելուց հետո որեւէ քննչական գործողություն չի իրականացվել։ Տեսակցությունն արգելված է, անգամ մանկահասակ երեխաներն իրենց հորը չեն կարողանում տեսնել։ Միայն հեռախոսազանգն է թույլատրվում։ Առաջին ատյանի դատարանում բողոքարկել եմ տեսակցությունն արգելելու որոշման դեմ, նիստը նշանակվել է հոկտեմբեր ամսին»,- ասաց Սիմոնյանը։
Փաստաբանն ասա, որ Արմեն Մելքոնյանն առողջական խնդիրներ ունի. «Զննել են երկու տարբեր բժիշկներ եւ տարբեր եզրակացություններ ներկայացրել։ Հիմա հույս ունենամ, որ երրորդ բժիշկ կզննի եւ եզրակացություն կտա»։
Հիշեցնենք, որ մայիսի 22-ին ԱԱԾ-ն հայտարարեց, որ քրեական աստիճանակարգության բարձրագույն կարգավիճակ ունեցող անձի կողմից, քրեական ենթամշակույթ կրող խմբավորում ստեղծելու եւ ղեկավարելու հիմնավոր կասկածանքով 2020թ. մայիսի 21-ին ՀՀ ԱԱԾ քննչական դեպարտամենտ է բերման ենթարկվել «Արսեն Երեւանսկի» մականունով Արսեն Մկրտչյանը եւ քրեական աստիճանակարգության բարձրագույն կարգավիճակ ունեցող անձի կողմից քրեական ենթամշակույթ կրող խմբավորմանը մասնակցելու կամ դրա հետապնդած նպատակների իրականացմանը ներգրավված լինելու կամ քրեական ենթամշակույթ կրող խմբավորման հավաքներ կազմակերպելու կամ դրանց մասնակցելու կասկածանքով՝ «Բասար» մականունով Արմեն Մելքոնյանը:
Արմեն Մելքոնյանին մեղադրանք է առաջադրվել ՀՀ ՔՕ 223.3-րդ հոդվածի հատկանիշներով (Քրեական ենթամշակույթ կրող խմբավորմանը մասնակցելը կամ ներգրավելը):