Հերթական անգամ ֆիքսվեց, որ Հայաստանն ունի պոպուլիստ ղեկավար, ով լուրջ քայլերի ընդունակ չէ, չի տիրապետում քաղաքականության պատմությանը. քաղաքագետը՝ վարչապետի HARDtalk-ին տված հարցազրույցի մասին

Վարչապետ Նիկոլ Փաշինյանի BBC-ի HARDtalk հաղորդման ժամանակ հնչեցրած պատասխանների բովանդակությունը շատ պարզ ու պրիմիտիվ էր, շատ դեպքերում թույլ պատասխաններ էին: Այս մասին Tert.am-ի հետ զրույցում ասաց քաղաքագետ Ստեփան Դանիելյանը:

Ըստ քաղաքագետի՝ դա ցույց է տալիս, որ Նիկոլ Փաշինյանն Արցախի հարցում գնում է ծանր բանակցությունների է, սակայն պատրաստ չէ դրանց: «Նա ամբողջական պատկերացումներ չունի՝ ի՞նչ է անելու, ինչի՞ համար է անելու, ո՞րն է խնդիրը. Արցախի հարցն էլ ընդհանուր Հայաստանի հարց է, աշխարհաքաղաքական իրավիճակ է, դա ոչ պատրաստ մարդու հաղորդում էր, միջին հայը մոտավորապես նույն պատասխանները կտար, դրանք քաղաքական գործչի պատասխաններ չէին, ինչը ցույց է տալիս, որ պետությունը որպես այդպիսին պատրաստ չէ միջազգային հարաբերություններին»,- կարծիք հայտնեց նա:

Դիտարկմանը, որ Փաշինյանը ևս մեկ անգամ խոսեց իր հայտնի թեզի մասին, որ ԼՂ հարցի լուծումը պետք է բավարարի երեք կողմերին էլ, Ստեփան Դանիելյանն ասաց, որ այդ բանաձևը դեմագոգիա է: «Սա ընդհանուր հարցից փախչելու եղանակ է, ժողովրդական բառով ասած՝ շուստրիություն: Այդ բանաձևը դատարկություն է, ոչ մի բան է և այդ բանաձևն անընդհատ կրկնելը ցույց է տալիս, որ այդ մարդն ընդհանարապես որևէ կոնցեպցիա չունի»,- ասաց նա:

Անդրադառնալով վարչապետի այն հայտարարությանը, որ «Արցախը Հայաստան է և վերջ» և որ դա պատմական ճշմարտություն է, ինչի համար հաղորդավարը նրան մեղադրեց ազգայնական լինելու մեջ, Դանիելյանն ասաց. «Նախ՝ առաջին հերթին Փաշինյանը լեզվին չէր տիրապետում, գուցե հայերեն խոսեր ավելի հաջող պատասխաններ կտար, անգլերենը չէր բավականացնում: Երկրորդ՝ պատմության մեջ մտնելը ոչ մեկին չի հետաքրքրում, պատմության մեջ այնքան բաներ են եղել, որ հիմա փոխվել է: Նա Խոջալուի առումով էլ շատ կոնկրետ պատասխաններ պետք է տար և նաև որոշ դեպքերում էլ հենց Անգլիայի պատմությունից կամ քաղաքականությունից մի երկու խոսք ասեր, որին իրենք պատասխան չէին ունենա: Այդպես պետք է անի քաղաքական գործիչը, որն ունի մտահորիզոն, գիտի քաղաքականությունը, գիտի պատմությունը և ճիշտ պահին ճիշտ պատասխանը տալիս է, եթե իրեն մեղադրում են, ինքը հակառակ մեղադրանքն է անում»:

Դիտարկմանը, թե տեսակետ կա, որ Հայաստանի վարկանիշի համար ավելի լավ կլիներ, եթե այս հարցազրույցը տեղի չունենար, ինքը կիսո՞ւմ է այս կարծիքը, Դանիելյանը նշեց, որ այդ հաղորդումն առաջին հերթին նայում են որոշակի քաղաքական և փորձագիտական շրջանակներ և նման հաղորդումով պատկերացում են կազմում ղեկավարի մակարդակի վերաբերյալ:

«Հերթական անգամ ֆիքսվեց, որ Հայաստանն ունի ոչ պատրաստ, պոպուլիստ ղեկավար, որը լուրջ քայլերի ընդունակ չէ և նաև ինտելեկտուալ խնդիր ունի, չի տիրապետում ընդհանրապես քաղաքականության պատմությանը և նրբություններին: Սա ֆիքսեցին վարչապետի մասին որպես կարծիք, հիմա ով ինչպես դա կօգտագործի արտաքին քաղաքականության, բանակցությունների մեջ, դա արդեն ուրիշ խնդիր է. ուղղակի գիտեն, որ այդ մարդուն կարելի է շատ հեշտորեն մանիպուլացնել, ինչպես ինքն է հասարակությանը մանիպուլացնում, այդքան էլ լուրջ միջազգային քաղաքական գործիչները իրեն կմանիպուլացնեն»:

Ինչ վերաբերում է նրան, որ հաղորդավարը մեջբերեց ընդդիմադիրների այն հայտարարությունները, թե ինքը ձախողել է կորոնավիրուսի դեմ պայքարը և դրա դեմ պայքարում է «լայվերով», ինչին Փաշինյանը պատասխանեց, թե Հայաստանը ժողովրդավար է հեղափոխությունից հետո և ինքն ուրախ է, որ ընդդիմությունը ազատորեն արտահայտվում է, Դանիելյանն ասաց, որ Նիկոլ Փաշինյանը սխալ է ասում, թե ինքը ժողովրդավարական երկիր է կառուցում:

«Ես նախկին իշխանություններին բազմիցս և սուր քննադատել եմ հենց իրենց իշխանության ժամանակ, բայց քաղաքական ազատություններն անհամեմատ ավելի շատ էին, քան հիմա և քաղաքական խոսքը բարձր ամբիոններից ավելի զուսպ ու հավասարակշռված էր և այդքան էլ օրենքներ չէին խախտում նույն խոսքի մեջ, որքան այսօրվա ղեկավարը: Այսինքն՝ այդ շտամպերը, որ Հայաստանը ժողովրդավարական երկիր չէր, հիմա ժողովրդավարական է նորից եմ կրկնում՝ ղալաթ է անում: Բնականաբար, իրեն հարց են տալիս, ինքը դեմագոգիայով է զբաղված և հերթական շտամպներն է փորձում օգտագործել»:

Ինչ վերաբերում է կորոնավիրուսին, Դանիելյանը նշեց՝ բոլորի համար էլ ակնհայտ է, որ իրենք տապալել են դրա դեմ պայքարը: «Հիմա որ հարց են տալիս, ինքը պետք է հակառակն ասի, առաջին անգամը չէ, առաջին դեպքը չէ, իրեն ինչ-որ բան բացատրելն էլ անիմաստ է և մեզ պետք էլ չէ, մենք մեր կարծիքն ինքնուրույն ենք կազմում: Ամեն ինչի վերաբերյալ էլ ինքը հակառակն է ասում. ասում է՝ տնտեսությունն էլ է ծաղկում, ամեն ինչ լավ է, հիմա իր խոսքերը մեզ համար արժեք չունեն, քանի որ կա իրականություն, մենք էլ բանական մարդիկ ենք, տեսնում ենք՝ ամեն ինչ, իմաստը ո՞րն է իր խոսքերը մեկնաբանել»,- շեշտեց նա: