Արաբագետ. Սիրիական ճգնաժամն առաջիկա ամիսներին ավելի կխորանա

Operativ.am–ի հետ զրույցում, մեկնաբանելով Սիրիայի նախագահ Բաշար Ալ-Ասադի՝ հունվարի 6-ին սիրիացի ժողովուրդին ուղղված ուղերձի բովանդակությունն, արաբագետ Արմեն Պետրոսյանը նշեց, որ ելույթի ելակետային դրույթները հատկապես երկրում առկա ճգնաժամի հանգուցալուծման վերաբերյալ, ըստ էության կրկնում են Սիրիայի նախագահի՝ նախկինում հնչեցրած հիմնական տեսակետերն ու դիրքորոշումն առ այն, որ երկրում չկա քաղաքական դիմակայություն, սիրիացի ժողովուրդը պայքարում է արտաքին ուժերի հովանավորությունը վայելող ահաբեկչական խմբավորումների և թալանչիական բնույթ ունեցող վարձկանների խմբերի, ավազակախմբերի դեմ, որ դա Արևմուտքի և Իսրայելի կողմից կազմակերպված մեծ դավադրություն է Սիրիայի և սիրիացի ժողովրդի ինքնուրույն քաղաքականության դեմ և այլն:

Այս հանգամանքը խոսում է այն մասին, որ սիրիական վարչակարգի հռետորաբանությունն, ըստ էության, չի փոխվել, և ընդհանրապես սիրիական հակամարտության մասնակից կողմերի մոտեցումները դարձել են առավել կարծր և ծայրահեղական, և սա այն պարագայում, երբ հակամարտ կողմերից որևէ մեկը չունի բացարձակ առավելություն: Վերոնշյալը թույլ է տալիս կանխատեսելու, որ հակամարտությունն առաջիկա ամիսներին կզարգանա նույն միտումներով՝ այսինքն հնարավոր է ռազմական գործողությունների աշխարհագրության և ակտիվության էլ ավելի ընդլայնում, առավել կբարդանա հումանիտար իրավիճակը մերձավորարևելյան այս երկրում:

Ըստ արաբագետի՝ ընդհանուր առմամբ, հասկանալի է սիրիական իշխանությունների նման գործելաոճը, քանի որ սա նաև քարոզչական և հոգեբանական դիմակայություն է, և միջազգային հարթակում հակամարտության կարգավորման ուղղությամբ ակնկալվող գործընթացներում նման կարծր դիրքորոշման պայմաններում սակարկելու հնարավորություններն ավելի են ընդլայնվում՝ ճանապարհ հարթելով հակամարտության բոլոր կողմերի վրա հավասարաչափ ճնշման կիրառման համար:

Սիրիական ճգնաժամի հանգուցալուծումն, ըստ արաբագետի, հավանական է հիմնականում երեք սցենարով.
Ա. Ի վերջո սիրիական վարչակարգի հակառակորդները կհասնեն Ալ-Ասադի իշխանությունից հեռացմանը, երկրի լքմանը կամ նրա ֆիզիկական ոչնչացմանը, սակայն դրանով թնջուկը չի հանգուցալուծվի, այլ նաև իշխանական ճամբարում կառաջանա քաոսային և անկառավարելի իրավիճակ, ինչպիսին մինչ այժմ առկա է վարչակարգի ընդդիմադիրների շրջանում:
Բ. Հաջորդ հնարավոր սցենարը Սիրիայի մասնատումն է, էթնոդավանական հիմքով, ըստ որի՝ Սիրիայի ներկայիս աշխարհագրական տարածքում կառաջանան երեք, գուցե նաև ավել վարչական միավորներ. երկրի արևմտյան ծովափնյա շրջաններում հնարավոր է ալավիական վարչակարգի պահպանումը, ինչը, սակայն, ձեռնտու չէ հակամարտության արտաքին խաղացողներին:

Գ. Թերևս ամենաընդունելի տարբերակը միջազգային և տարածաշրջնային հովանավորությամբ կայացած համաձայնության պայմաններում և հակամարտ կողմերի նկատմամբ գործադրված հավասարահեռ և արդարացի մոտեցման պարագայում կոնցեսուսային լուծման հնարավորությունն է, որի արդյունքում երկրում կկազմավորվի անցումային կառավարություն և միջազգային երաշխիքների ներքո կձևավորվեն քաղաքական և կառավարման նոր ինստիտուտներ,_ նշեց Արմեն Պետրոսյանը: