Ո՞վ կփոխարինի Մանե Թանդիլյանին խորհրդարանում (լուսանկար)

«Լուսավոր Հայաստան» կուսակցության ռեյտինգային ընտրակարգի ցուցակում Մանե Թանդիլյանից հետո ամենաշատ ձայները ստացել է Ստեփան Ստեփանյանը։

Նա ռեյտինգային ընտրակարգով առաջադրվել էր Երևանի Կենտրոն, Նորք Մարաշ և Էրեբունի վարչական շրջանները ընդգրկող թիվ 4 ընտրատարածքում: Ըստ ԿԸՀ-ի արձանագրության՝ Ստեփան Ստեփանյանն այդ ընտրատարածքում ստացել է 828 ձայն։ Ստեփանյանը «Լուսավոր Հայաստան» կուսակցության համամասնական ցուցակի 96-րդ համարն է։

NEWS.am-ը փորձեց ԼՀԿ-ից մեկնաբանություն ստանալ, թե ո՞վ է լինելու խմբակցության նոր պատգամավորը, սակայն մեր զանգերն անպատասխան մնացին, իսկ ԼՀԿ մամուլի խոսնակ Արեն Պետունցն էլ ասաց, որ առաջիկա ժամերին մամուլի հաղորդագրություն են տարածելու, որտեղ բոլոր հարցերի պատասխանները կլինեն։

Ավելի ուշ կուսակցությունից հայտնեցին, որ Մանե Թանդիլյանի` «Լուսավոր Հայաստան» կուսակցության ցուցակով թիվ 4 ընտրատարածքից ստացված պատգամավորական մանդատը օրենքով սահմանված կարգով դադարելուն պես անցնելու է ռեյտինգային ընտրակարգով նրան հաջորդող ամենաշատ ձայներ ստացած թեկնածուին` Ստեփան Ստեփանյանին, ով հանդիսանում է «Լուսավոր Հայաստան» կուսակցության Երևանի տարածքային խորհրդի անդամ:

Հիշեցնենք, որ ավելի վաղ «Լուսավոր Հայաստան» խմբակցության պատգամավոր Մանե Թանդիլյանը ֆեյսբուքյան գրառմամբ հայտնեց, որ ստիպված է վայր դնել պատգամավորական լիազորությունները, ինչպես նաև դադարեցնել գործունեությունը՝ որպես Լուսավոր Հայաստան կուսակցության կառավարման խորհրդի անդամ։ Տիկին Թանդիլյանը առողջական խնդիրներ ունի, որոնք ըստ նրա՝ անհամատեղելի են պատգամավորական և ակտիվ քաղաքական գործունեության հետ։

Հավելենք, որ ԱԺ Կանոնակարգ սահմանադրական օրենքի համաձայն՝ պատգամավորը հրաժարականի մասին իր գրավոր դիմումը պաշտոնապես ներկայացնում է Ազգային ժողովի նախագահին, ով այդ մասին հանդես է գալիս հայտարարությամբ։ Եթե հրաժարականի հրապարակումից հետո՝ մեկ շաբաթվա ընթացքում, պատգամավորը գրավոր դիմումով՝

1) հետ է վերցնում հրաժարականի մասին իր դիմումը, ապա Ազգային ժողովի նախագահն այդ մասին հանդես է գալիս հայտարարությամբ.

2) հետ չի վերցնում հրաժարականի մասին իր դիմումը, ապա նրա լիազորությունների դադարման մասին կազմվում է արձանագրություն, որն ստորագրում և հրապարակում է Ազգային ժողովի նախագահը: Արձանագրության հրապարակման պահից հրաժարականը համարվում է ընդունված:

Ստորև ներկայացնում ենք Ստեփան Ստեփանյանի կենսագրական տվյալները:

Ստեփան Ստեփանյանը ծնվել է 1988 թ. մայիսի 30–ին:

1995-2005 թթ. սովորել և գերազանցությամբ ավարտել է Ա. Մարգարյանի անվան N 29 միջնակարգ դպրոցը:

2005-2010 թթ. սովորել և ավարտել է Հայ-Ռուսական Սլավոնական համալսարանի քաղաքագիտության ֆակուլտետի միջազգային հարաբերություններ բաժինը, որակավորվելով որպես քաղաքագետ-միջազգայնագետ:

2012-2016 թթ. սովորել է ՀՀ ՊԿԱ կառավարման հոգեբանության ամբիոնում որպես ասպիրանտ:

Ունի 12 տպագրված գիտական աշխատանք տեղական և միջազգային գիտական ամսագրերում:

2011թ.-ից առ այսօր դասավանդում է ՀՀ Արդարադատության նախարարության «Իրավական կրթության և վերականգնողական ծրագրերի իրականացման կենտրոն» ՊՈԱԿ-ում:

2014-2016 թթ. դասավանդել է Հայաստանում ֆրանսիական քոլեջում։

2011-2018 թթ. աշխատել է «Ռոսգոսստրախ-Արմենիա» ԱՓԲԸ–ում զբաղեցնելով տարբեր պաշտոններ:

Ամուսնացած է, ունի երկու դուստր։