Ավելի քան 5800 ամերիկացիներ 2020թ․ առաջին վեց ամիսների ընթացքում հրաժարվել են իրենց քաղաքացիությունից
Ավելի քան 5800 ամերիկացիներ հրաժարվել են իրենց քաղաքացիությունից 2020-ի առաջին վեց ամիսների ընթացքում՝ համեմատած 2072 ամերիկացիների հետ, ովքեր իրենց քաղաքացիությունից հրաժարվել են ամբողջ 2019-ի ընթացքում, Bambridge Accountants-ի տվյալներն է հայտնում CNN-ը:
USA.one-ը տեղեկացնում է, որ ընկերությունը հայտնել է, թե յուրաքանչյուր երեք ամիսը մեկ ուսումնասիրում է ԱՄՆ կառավարության հրապարակած հասանելի տվյալները՝ բոլոր այն ամերիկացիների անուններով, ովքեր հրաժարվել են քաղաքացիությունից: «Սրանք հիմնականում այն մարդիկ են, ովքեր արդեն հեռացել են ԱՄՆ-ից եւ պարզապես որոշել են, որ արդեն բավական է»,- ասում է Bambridge Accountants-ի գործընկեր Ալիստեր Բեմբրիջը: «Մենք տեսանք, որ մարդիկ անհանգստանում են այն ամենի համար, ինչ կատարվում է նախագահ Դոնալդ Թրամփի հետ, ինչպես են պայքարում կորոնավիրուսի համավարակի դեմ, Միացյալ Նահանգների այժմյան քաղաքականության համար»: Բեմբրիջը հայտարարել է, որ թեեւ շատերը, ովքեր հրաժարվել են քաղաքացիությունից, բողոքում են, որ դժգոհ են Միացյալ Նահանգների ներկա քաղաքական մթնոլորտից, այսպիսի որոշման մյուս պատճառը հարկերն են: Արտերկրում բնակվող ԱՄՆ քաղաքացիները դեռ պետք է ներկայացնեն հարկային հայտարարագրեր, հայտնեն իրենց արտասահմանյան բանկային հաշիվների, ներդրումների եւ կենսաթոշակների մասին: Շատերի համար ԱՄՆ-ում հարկային տարեկան հաշվետվությունները չափազանց ծանր են:
Ամերիկացիները, ովքեր ցանկանում են հրաժարվել քաղաքացիությունից, պետք է 2350 դոլար վճարեն իրենց հայրենիքում ԱՄՆ դեսպանատանը: Չնայած ԱՄՆ քաղաքացիությունից հրաժարվելու ռիսկերին, Բեմբրիջը կանխատեսում է, որ այս միտումը միայն կաճի: «Շատերը սպասում են նոյեմբերի ընտրություններին, որպեսզի տեսնեն, թե ինչ կլինի հետո,- ասել է նա,- Եթե նախագահ Թրամփը վերընտրվի, մենք կարծում ենք, որ կլինի մարդկանց եւս մեկ ալիք, որոնք կորոշեն հրաժարվել իրենց քաղաքացիությունից»: