Իմ հրամանով է եղել, որ չեն կրակել. Չեմ գտել նպատակահարմար, որ Ռադիոտուն մտնելու համար մարդ պետք է սպանվի. Վլադիմիր Գասպարյան

Երբ դու դագաղ ես դնում ուրիշների դռան առջևում, սպասիր, որ մի օր քո մեռելներին հանեն, կդնեն դագաղի մեջ ու կբերեն քո դռների մոտ։ Այս մասին 168.am-ի՝ Սաթիկ Սեյրանյանի հեղինակային «PRESSING» հաղորդաշարի ընթացքում հայտարարել է նախկին ոստիկանապետ, ոստիկանության գեներալ-գնդապետ Վլադիմիր Գասպարյանը, ընդգծելով, որ դիտավորյալ է բերում այդ օրինակը և նկատի ունի 2018-ին ՀՀԿ խմբակցության պատգամավորների տան մոտ դագաղներ տանելու միջադեպերը։

«Դա այլասերված մտածողության հետևանք է, դա ադեկվատ, նորմալ մարդու արարք չի։ Մի աննորմալ այդպիսի բան է անում, իսկ այդ աննորմալությունը մի ամբողջ շարժում էր, վաղը մի ավելի այլասերված մտածողություն ունեցող էլ հանի ձեր մեռելները ու բերի դնի ձեր տան մոտ, հետո՞, ու այդպես գնա՞», ասել է Վլադիմիր Գասպարյանը։

Ըստ նախկին ոստիկանապետի՝ 2018-ին տեղի ունեցածը կառավարել են դրսից ֆինասնավորվող ուժերը, տեխնոլոգիաների կիրառմամբ։ Վ․Գասպարյանը 2008 և 2018 թվականներին տեղի ունեցածների միջև որոշակի ընդհանրություններ տեսնում է։

«Ռադիոտունը հատուկ պահպանվող օբյեկտ է, իրականացվում է զինված պաշտպանություն: Իմ հրամանով է եղել, որ չեն կրակել, թե չէ ոստիկանները զինված էին հրազենով, և նրանք իրավունք ունեին ու պարտավոր էին այն կիրառել, եթե իրենց կյանքին ու առողջությանը վտանգ սպառնար: Ես եմ կանգնեցրել: Ես հասցրել եմ զանգել ու ասել՝ կրակոց չլինի: Չեմ գտել նպատակահարմար, որ Ռադիոտուն մտնելու համար մարդ պետք է սպանվի»,- նշել է Վլադիմիր Գասպարյանը՝ անդրադառնալով 2018թ. Նիկոլ Փաշինյանի և նրա աջակիցների կողմից Ռադիոտուն ներխուժելու և դրան ոստիկանության չմիջամտելու հարցին:

Նրա խոսքով՝ ինքը նպատակահարմար է գտել չկրակել, իսկ ահա Ռադիոտունը գրավելու համար դատաիրավական ընթացք տալը դատախազության պարտականությունների տիրույթում էր:

«Իսկ տեխնոլոգիաներ կիրառվել են, անչափահասներին ներքաշելը, հղի կին առաջ մղելը․․․ Մենք դա տեսնում էինք, բայց մեր խնդիրը ազգաբնակչությանը պաշտպանելն էր, մեր ակտիվ գործողությունները կարող էին հանգեցնել զոհերի, առնվազն վնասվածքների։ Անչափահասներին ներքաշելը ճիշտ մեթոդ չի, դրա դառը պտուղները քաղելու են։ 2015-ին «Էլեկտրիկ Երևանի» ժամանակ մենք ջրցան մեքենա կիրառել ենք, նախ դրա իրավունքն ունեինք, բացի այդ, երբ մենք տարանջատեցինք մաքուր ուժերին նրանցից, ովքեր եկան հավաքագրելու այդ մաքուր ուժերին, ագրեսիա մտցնելու նրանց մեջ։ Մենք օպերատիվ ինֆորմացիա ունեինք, որ սադրանք են ուզում անել, ցեմենտ էին վերցրել, գրպանները լցրել, որպեսզի մոտենան ոստիկաններին և շփեն աչքերին, ես եմ հրամայել կիրառել ջրցան մեքենա, մենք ուղղակի ցնցուղ ենք արել, եթե իրական ուժով կիրառեինք, 5-6 մետր թռչելու էին, կոտրվածքներ էին ստանալու, մենք ուղղակի ջրեցինք, որ ցեմենտը նրանց գրպանում շաղախվեր։ Մենք նպատակահարմար չենք գտել նման բաները հրապարակել։ Այդ գործողություններին մասնակցողներից էր նաև իմ տեղակալը, որը հիմա մարզպետ է։ Այս անգամ կեղտոտ տեխնոլոգիաներ կիրառվեցին։ Երեխաներին ներքաշել չի կարելի, մենք փոքր երկիր ենք, եթե լավ պրպտենք՝ բոլորս բարեկամ դուրս կգանք։ Երրորդ նախագահը, երբ հարցրեց՝ քանի հոգի են, ինչ միջոցներ են հնարավոր, ես ներկայացրի, որ կարելի է մեծ զգուշությամբ ցրել, զոհերն ու վիրավորները բացառելով, թեև վտանգավորն այն էր, որ երեխաներ ու հղի կանանց կարող էին օգտագործել որպես վահան, նա չհամաձայնեց, ասելով, որ հանկարծ կարող են և այդպիսի հետևանքներ լինել, ոչ մի իշխանություն չարժի, որ այն արյունով պահվի կամ վերցվի։ Ես համաձայն եմ իր հետ»,- ասել է Վլադիմիր Գասպարյանը։