Նորամարգի դպրոցի նախկին տնօրենը հաղորդում է ներկայացրել դատախազություն՝ տնօրենի մրցույթը 2 անգամ տապալելու համար
Արարատի մարզի Նորամարգի դպրոցի նախկին տնօրեն Ծովինար Գալստյանը օգոստոսի 10-ին, հաղորդում է ներկայացրել դատախազություն՝ ըստ որի մարզպետարանը և համայնքապետարանը, իրենց իշխանական լծակները օգտագործելով՝ միտումնավոր տապալել են դպրոցի տնօրենի մրցույթը 2 անգամ:
Այս մասին այսօր՝ օգոստոսի 11-ին, NEWS.am-ի հետ զրույցում ասել է Նորամարգ գյուղի դպրոցի նախկին տնօրեն Ծովինար Գալստյանը:
Նրա խոսքով՝ նորանշանակ տնօրենը սխալ կարծիք ունի, եթե ասում է, որ միտումնավոր չի տապալվել մրցույթը, քանի որ հակառակ դեպքում, նա էլ առաջին օրվանից իրենց հետ միասին պետք է պայքարեր. «Եթե պետք է գնա նշանակման, ինչո՞ւ տապալվի մրցույթը, եթե հնարավորություն ունենք մեր զարգացման ծրագրերը ներկայացնել՝ երեք թեկնածուով: 3 հոգուց միայն ես դիմեցի իրավապահ մարմիններին, բողոք ներկայացրի նախարարություն, Կառավարություն և այլն, իսկ 2 թեկնածուները շատ հանգիստ դիտորդի կարգավիճակում հետևում էին»,- ասաց նախկին տնօրենը:
Նրա խոսքով՝ երկրորդ մրցույթի ժամանակ դպրոցի նորանշանակ տնօրենԳոհար Սահակյանը եկել է մրցույթից 10 րոպե առաջ՝ կարծես իմանալով, որ տապալվելու է այն. «Այդտեղից ես ունեմ ենթադրություններ, որ այդ անձնավորությունը, մյուս թեկնածուն նախապես գիտեին նախնական գծված ծրագիրը, դա նրանց չէր անհանգստացնում»,- ասաց Ծովինար Գալստյանը:
Նա նշեց, որ Կառավարությունից ստացել են 2 գրություն՝ հասցեագրված Տարածքային կառավարման և ենթակառուցվածքների նախարար Սուրեն Պապիկյանին և ԿԳՄՍ նախարար Արայիկ Հարությունյանին:
«Գրության մեջ մեզ ասվում էր, որ, դպրոցի կանոնադրության համաձայն, կառավարման խորհրդի անդամները պարտավոր են ներկա գտնվել բոլոր նիստերին, բարեխիղճորեն մասնակցել և որոշումներ կայացնել ի նպաստ դպրոցի և երեխաների շահերի և, նշելով օրենքի այդ կետերը, նախարարությունը դիմել է Սուրեն Պապիկյանին, իսկ մեզ հորդորում է դիմել իրավապահ մարմիններին, այսինքն նախարարությունը նույնպես տեսել է հանցավոր տարրեր այդ գործողությունների մեջ: Իսկ մարզպետարանը ներկայացրել էր բացատրություն Սուրեն Պապիկյանին, այն նույն տեքստը, ինչ տեղադրված է մարզպետարանի էջում, այսինքն, իրենք միտումնավոր չեն ներկայացել մրցույթին, իրենց դիրքորոշումը այդ կերպ արտահայտելու համար, քանի որ մտածել էին, որ նորից կընտրվեմ ես»,- ասաց նա:
Ծովինար Գալստյանը վստահեցրեց, որ այս պարագայում միակ ելքը դատական ճանապարհով հասնել է հարցի արդար լուծմանը:
Հարցին՝ինչ ակնկալիքներ ունեն, ա նախկին տնօրենը պատասխանեց. «Եթե ունենք փաստեր և հայտ ենք ներկայացրել, ուրեմն գնահատել ենք նաև մեր շանսերը, ունենք նաև ակնկալիքներ, որ ի վերջո կհաստատվի իշխանական լծակների չարաշահումը, բնականաբար, պետք է չեղարկվեն մրցույթի արդյունքները, որից հետո պետք է հայտարարվի թափուր տեղի համար նոր մրցույթ և հետո կայանան նոր ընտրություններ:
Դա է մեր միակ նպատակը:
Դատարանը պետք է վիճարկի փոխվարչապետի նշանակումը»,- ասաց նա:
Երեկ ուսուցիչների և աշակերտների ծնողների հետ հանդիպման ժամանակ նորանշանակ տնօրենը հերքեց Արարատի մարզպետի հետ մերձավորական կապ ունենալու մասին տարածված լուրը:
Ծովինար Գալստյանը դա նորմալ է համարում՝ ասելով, որ բոլոր դեպքերում Գոհար Սահակյանը պետք է այդպես ասեր, սակայն, ըստ նրա, կան այլ վարկածներ, որից ամենահավանականն այն է, որ Գոհար Սահակյանը քավոր-սանիկակակն կապ ունի համայնքապետ Արման Թադևոսյանի հետ. «Բայց թե հիմքում ինչ կա բացի ծանոթ, բարեկամ հարաբերություններից, չեմ կարող ասել, ընդամենը, մենք կարող ենք ենթադրել, որ եթե մեր այսքան բողոքներից հետո խնդրին լուծում դեռ չի տրվել, ուրեմն, կա մեկ այլ բան ևս, որի մասին չեն խոսում չեն ուզում պատկան մարմինները»,- ասաց Ծովինար Գալստյանը:
Հիշեցնենք, որ հուլիսի 17-ին նշանակված առաջին ընտրությունը չէր կայացել՝ ԿԳՄՍ նախարարության 3 ներկայացուցիչների չներկայանալու պատճառով։ 5 աշխատանքային օր հետո՝ հուլիսի 23-ին, պետք է 2-րդ անգամ կայանար ընտրությունը, սակայն այս անգամ էլ ընտրությանը ներկա չեն եղել մարզպետարանի 2 և համայնքի 1 ներկայացուցիչը։
Տնօրենի ընտրությունը կատարվում է 8 հոգանոց խորհրդի կողմից, որից 3-ը Կրթության, գիտության, մշակույթի և սպորտի նախարարության ներկայացուցիչներն են, 2-ը՝ մարզպետարանի, 1-ը՝ համայնքի, 2-ը՝ դպրոցական խորհրդի։
Նախօրեին դպրոցի մոտ տեղի էր ունենում հերթական բողոքի ակցիայ, որի ընթացքում նորանշանակ տնօրենը հանդիպեց ուսուցիչների և ծնողների հետ, սակայն, նա ասաց, որ չի պատրաստվում առանց հիմավոր պատճառի թողնել այդ պաշտոնը:
Նշենք նաև, որ Նորամարգում խոսակցություններ կան, որ նորանշանակ տնօրենի Արարատի մարզպետ Գարիկ Սարգսյանի մերձավորներից է, սակայն երեկ դա Գոհար Սահակյանը հերքեց: