Սլովակիայի վարչապետը մեկնաբանել է ռուս դիվանագետների վտարումը երկրից

Սլովակիայի վարչապետ Իգոր Մատովիչը, մեկնաբանելով երեք ռուս դիվանագետի վտարումը երկրից, ասել է, որ երբեմն անհրաժեշտ է սահմանագիծ ունենալ նաեւ ընկերների համար, հայտնում է «ՌԻԱ Նովոստի»-ն:

Երկուշաբթի օրը Սլովակիայի արտաքին գործերի նախարարությունը հայտարարել էր, որ հանրապետությունից վտարվել է երեք ռուս դիվանագետ, որոնց գործողությունները հակասում են Վիեննայի «Դիվանագիտական ​​հարաբերությունների մասին» կոնվենցիային: Բացի այդ, ինչպես «ՌԻԱ Նովոստիի»-ն հայտնել է Սլովակիայի արտգործնախարարության մամուլի քարտուղար Յուրայ Տոմագան, Սանկտ Պետերբուրգում Սլովակիայի գլխավոր հյուպատոսությունը չարաշահել է տրված վիզաները եւ այդպիսով հանցագործություն է կատարել ՆԱՏՕ-ի եւ ԵՄ այլ անդամ պետության տարածքում: Նա չի հստակեցրել, թե կոնկրետ ինչի մասին է այս դեպքում խոսքը:

Իր հերթին, Բրատիսլավայում Ռուսաստանի դեսպանատան ներկայացուցիչ Վլադիսլավ Կուլիկովը «ՌԻԱ Նովոստի»-ին ասել է, որ դեսպանատունը չի մեկնաբանում այս տեղեկատվությունը եւ խորհուրդ է տվել մեկնաբանություններ ստանալ Սլովակիայում համապատասխան իրավասու մարմիններից:

«Լինում են դեպքեր, երբ սահմանագիծ պետք է անցկացնես նույնիսկ ընկերների համար: Այո, ռուսները մեր սլավոնական եղբայրներն են, եւ Ռուսաստանը մեր առեւտրային գործընկերն է: Սակայն դա չի փոխում այն ​​փաստը, որ Սլովակիան ինքնիշխան պետություն է, եւ ոչ թե բանանային հանրապետություն, որտեղ կարելի է ծաղրի ենթարկել դիվանագիտական ​​կանոնները»,- գրել է վարչապետը երեքշաբթի Facebook-ում: